Catro mil persoas, entre elas Ana Pontón e Goretti Sanmartín, claman en Santiago contra o "xenocidio" do pobo palestino

Centos de persoas participaron na tarde noite deste luns en concentracións convocadas en 15 municipios galegos en repulsa á resposta militar do Estado de Israel na Franxa de Gaza e para denunciar a "complicidade" da comunidade internacional co "xenocidio" do pobo palestino.

Convocados por varias organizacións como a Asociación Galaico Árabe Jenin, BDS Galiza, Galiza por Palestina e Mar de Lumes; as sete cidades galegas e outras nove localidades acolleron protestas nas que os manifestantes portaron bandeiras palestinas e corearon cánticos contra a actuación de Israel.

En Santiago, a elevada afluencia de persoas fixo que a concentración convocada inicialmente na Praza do Toural saíse en marcha polas rúas da capital galega para concluír na Praza de Praterías. 

Alí finalizou unha protesta na que participaron unhas 4.000 persoas que corearon cánticos como "non é unha guerra, é un xenocidio", "Estado sionista, estado terrorista", "Galicia e Palestina, solidariedade" ou "Palestina vencerá".

Ao termo da marcha procedeuse á lectura dun manifesto no que se censurou o "apoio entusiasta" da comunidade internacional á resposta militar ofrecida polo Estado de Israel tras os atentados de Hamás.

"O dereito a defensa é entendido dunha forma perversa, porque vale para o agredido pero non para o agresor", proclamou o texto lido en Praterías, no que se denunciou que a "macabra conta atrás" do Estado de Israel para proceder ao "xenocidio" da poboación palestina en Gaza "súmase a unha longa lista de crimes" e á situación de "apartheid" que o pobo de Palestina sofre "desde hai décadas".

Na protesta participou a alcaldesa de Santiago, Goretti Sanmartín, xunto a outros membros do BNG como a portavoz nacional, Ana Pontón, e o deputado no Congreso, Néstor Rego.