O legado do Seminario de Estudos Galegos conmemórase cun programa especial na Cidade da Cultura

Coincidindo co centenario da fundación do Seminario de Estudos Galegos, a Xunta organiza na Cidade da Cultura un programa especial de actividades ao redor da exposición 'Luz na Terra. O Seminario de Estudos Galegos, unha institución de alta cultura'. Co obxectivo de achegar a toda a cidadanía o legado do Seminario, esta programación inclúe tanto talleres didácticos para os mozos como un programa de visitas especiais para o público adulto, conducidas por algún dos maiores expertos de Galicia na historia desta institución.

Segundo informou o Executivo galego, o martes 17 de outubro o comisario da exposición, Ramón Villares, abrirá o ciclo de visitas guiadas especiais. Así, o martes 24 de outubro será a quenda da vicepresidenta do Museo do Pobo Galego, María Xosé Fernández Cerviño, e en novembro o ciclo continuará o martes 7 cunha visita conducida polo presidente da Fundación Castelao e un dos asesores documentais da mostra, Miguel Anxo Seixas Seoane.

As dúas últimas quendas serán para o presidente do novo Seminario de Estudos Galegos, o científico e escritor Francisco Díaz-Fierros Viqueira, o 14 de novembro, e para o catedrático de Filoloxía Galega e Portuguesa e investigador do Instituto da Lingua Galega da USC, Henrique Monteagudo, o 21 de novembro. Todas as visitas serán ás 17.00 horas e gratuítas e para asistir haberá que reservar praza na web da Cidade da Cultura.

Con todo, a partir da próxima semana no Museo Centro Gaiás os mozos poderán descubrir e interpretar o mundo, experimentando con diferentes linguas e achegándose dunha forma lúdica á historia de Galicia e ao espírito aberto, integrador e científico do Seminario de Estudos Galegos.

Membros do Seminario de Estudos Galegos, entre eles, Filgueira Valverde, Carballo Calero ou Castelao | Fonte: Arquivo