Traballadores de Ence reclaman investimentos na fábrica, ao entender que é un "compromiso moral" con Pontevedra
Os traballadores esixen á Dirección da empresa que aprobe un Plan Industrial e un Plan Estratéxico, agora que xa ten despexado o seu futuro por mor da sentenza do Tribunal Supremo do pasado 7 de febreiro, na que se ratificaba a legalidade da prórroga da concesión por 60 anos outorgada en 2016 para seguir ocupando os terreos de dominio público marítimo terrestre nos que está instalada a fábrica na ría.
Por Europa Press / Redacción | PONTEVEDRA | 10/10/2023 | Actualizada ás 12:27
O comité de empresa de Ence concentrouse este martes pola mañá fronte á portaría da fábrica de Lourizán para reclamar un "plan firme de investimentos" na planta, ao entender que é "un compromiso moral" con Pontevedra.
Os traballadores esixen á Dirección da empresa que aprobe un Plan Industrial e un Plan Estratéxico, agora que xa ten despexado o seu futuro por mor da sentenza do Tribunal Supremo do pasado 7 de febreiro, na que se ratificaba a legalidade da prórroga da concesión por 60 anos outorgada en 2016 para seguir ocupando os terreos de dominio público marítimo terrestre nos que está instalada a fábrica na ría de Pontevedra.
"É un compromiso moral con Galicia, con Pontevedra, co sector forestal, co da loxística, do transporte, da área portuaria de Marín, dos traballadores tanto de Pontevedra como das súas empresas auxiliares, así como con todo o emprego directo, indirecto e inducido que promove", sinalou o secretario do comité de empresa da fábrica, Rubén Fernández.
Oito meses despois da publicación desa sentenza do Supremo, os traballadores consideran que "é xa o momento" para que se aprobe un Plan Industrial que permita "dar continuidade ao emprego que esta empresa promove". Este representante do persoal da fábrica de pasta de papel espera que a Dirección poña en marcha estes investimentos "promovendo un traballo digno, de calidade, respectuoso co medio ambiente e que permita afianzar o futuro laboral aquí en Pontevedra".
MELLORA DAS INSTALACIÓNS E ADAPTACIÓN AO MERCADO
Ese plan que demandan, segundo explicou, deberá contemplar a mellora das instalacións da fábrica de Lourizán, así como "un plan estratéxico" que permita a adaptación ao mercado actual, e que sexa "ambicioso, comprometido co emprego" para poder "crecer e ser unha empresa de referencia a nivel nacional e internacional".
O presidente do Comité de Empresa da fábrica de Ence, Manuel Rivas, engadiu que "eses plans de investimento" son "simplemente diñeiro" para que a planta siga funcionando, e teña futuro, e para poder estar "no mercado". "Se non, ímonos a empezar a quedar fóra", advertiu.
O Comité de Empresa de Ence en Pontevedra tamén convocou esta mobilización para protestar polos recortes de servizos de limpeza e mantemento, e de persoal de contratas auxiliares, denunciando o desmantelamento do Centro Especial de Emprego do Grupo EULEN na portaría e báscula de entrada a este centro industrial, "co consecuente despedimento das súas traballadoras".
