Por E.P. | SANTIAGO DE COMPOSTELA | 06/10/2023 | Actualizada ás 19:10
Coincidindo co día no que Manuel María cumpriría 94 anos, o Consello da Cultura Galega incluíu a súa biografía no proxecto Álbum de Galicia, grazas a un texto elaborado por Alberte Ansede.
Manuel María Fernández Teixeiro naceu o 6 de outubro de 1929 en Outeiro de Rei, lugar que o marcaría profundamente. A entrada destaca o seu carácter "inquieto e inquietante" que o levou, con só 19 anos, a impartir a súa primeira conferencia no Círculo das Artes de Lugo e, con 23, a ter escritos oito libros de versos, que mostran unha notable vocación literaria e unha gran habilidade para levar á escritura un mundo interior moi rico marcado polo malestar persoal que lle provocan as contradicións familiares, o desengano relixioso, o falecemento do seu irmán novo nun accidente e mesmo a temática amorosa.
Alberte Ansede destaca o cambio que se produce nel en 1956, cando coñece a Saleta Goi, coa que casa tres anos despois. Superada unha atmosfera de pesimismo, incomprensión e soidade, continúa coa súa escritura e crece a súa vocación política.
Na entrada, Alberte Ansede destaca que a súa ampla obra "ocupa toda a segunda metade do século XX e tórnase a máis completa e mellor crónica literaria do esforzo do pobo galego por tomar as rendas do seu destino e normalizar a súa lingua e cultura". Nesa intención por normalizar a escritura literaria cultivou amplamente todos os xéneros literarios. Ingresou na Real Academia Galega en 2003.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.