A oposición cualifica de "electoralista" os bonos deporte e ser o sinal de saída para a campaña das autonómicas

O BNG e o PSdeG cualificaron de "propaganda" o bono de 130 euros para compra de material deportivo para familias con fillas ou fillos federados, un anuncio, para a oposición, "electoralista" co que cren que o presidente da Xunta, Alfonso Rueda, deu o "pistoletazo de saída" á campaña das eleccións galegas que deben celebrarse nos próximos meses.

O anuncio realizado por Rueda no acto cos seus conselleiros celebrado o pasado luns en Santiago tomou protagonismo nas comparecencias de prensa posteriores á xunta de portavoces que deu forma ao próximo pleno ordinario do Parlamento galego, que terá lugar os días 26 e 27 de setembro.

Alí, os portavoces da oposición, o nacionalista Luís Bará e o socialista Luís Álvarez, criticaron o "exercicio de propaganda" que, a xuízo de ambos, supuxo o acto de inicio de curso político organizado o luns polo Executivo autonómico, que interpretan como o arranque da precampaña para os comicios autonómicos que han de celebrarse, en caso de non haber adianto, en 2024.

"É moi difícil contentar á oposición, que está no non polo non e na negativa constante a calquera proposta", rebateu o portavoz parlamentario do PP, Alberto Pazos Couñago, que engadiu que BNG e PSdeG realizan "propostas que non apoia ninguén" e que, di, "deben de ser pensando na bondade e na efectividade por atender a seres de luz".

"CAFÉ PARA TODOS"

Antes de que o portavoz do grupo que sustenta ao Goberno galego pechase a rolda de comparecencias ante os medios, o portavoz socialista na Cámara, Luís Álvarez, puxo o foco en que a medida anunciada por Rueda o luns suporá un desembolso de 16 millóns de euros repartidos "para todo o mundo" con independencia do nivel de ingresos das familias, tanto para "as que teñen rendas de 12.000 euros" ao ano como para a que alcanzan "os 120.000".

"A precampaña de Rueda, que vén longa, vainos a custar aos galegos unha millonada", aseverou o socialista, rebatido máis tarde, a preguntas dos xornalistas sobre esta crítica, polo seu homólogo no Grupo Popular con que as medidas deben ser xulgadas polos seus "obxectivos" e que, neste caso, estes son "fomentar a vida saudable de todos".

"O mesmo que cando se toman determinadas medidas en materia demográfica, o que tentamos é animar ao conxunto da poboación a facilitar as condicións para que aumente a demografía no noso país. Para que aumente porque hai máis facilidades para todos, independentemente das rendas, de conciliar e demais", apuntou Pazos Couñago, que censurou que se comparen "medidas diferentes" que teñen "obxectivos diferentes"

PAULA PRADO

A secretaria xeral do PPdeG, Paula Prado, defendeu a axuda de 120 euros a nenos federados para material escolar ou clases anunciado pola Xunta, así como o seu carácter universal, fronte ás críticas da oposición de que isto non se fixese para os libros de texto.

"Son medidas que axudan ás familias", recalcou a secretaria xeral do PPdeG para quen se trata dunha crítica que non ten "percorrido" por parte dunha oposición "instalada en se hai que darlle o goberno a Sánchez".

"É para axudar ás familias nun momento no que se está pasando moi mal que é a volta ao colexio e as familias priorizan outras cousas, a práctica do deporte tamén é fundamental e que ningún neno ou nena teña que deixalo por non poder facer fronte ao custo", sentenciou. Ademais, engadiu que a Xunta xa destina partidas para "compra de libros e de material escolar para as familias que máis o necesitan".

LEI DO 'SÓ SI É SI'

Noutra orde de cousas, a secretaria xeral do PPdeG avanzou que o seu partido presentará no Parlamento galego unha iniciativa para esixir que "se asuman responsabilidades pola nefasta aplicación" da lei do 'só si é si'.

"56 agresores sexuais con penas rebaixadas e seis excarceracións", engadiu sobre os datos de Galicia. Ademais, reprochou que non se produciron "dimisións" ou se asumisen "responsabilidades".