Por Europa Press / Redacción | PONTEVEDRA | 15/09/2023 | Actualizada ás 18:57
O Goberno local de Pontevedra presentou ante o Tribunal Constitucional un recurso de amparo por "vulneración da tutela xudicial efectiva con indefensión do Concello" tras o fallo do Tribunal Supremo (que rexeitou as apelacións do concello e da Avogacía do Estado) contra a prórroga de Ence na ría. Trátase dunha medida que o propio o alcalde, Miguel Anxo Fernández Lores, anunciara o pasado mes de xullo.
Despois de que fose desestimado un incidente de nulidade presentado polos servizos xurídicos do consistorio en colaboración co equipo de traballo contratado para a ocasión co gabinete CSS Avogados encabezado polo exministro socialista Francisco Caamaño, o Goberno local eleva as súas reclamacións ao Tribunal Constitucional.
En canto ás consideracións que ten en conta este recurso de amparo, destaca que a Audiencia Nacional recibira ata seis motivos distintos para anular a prórroga de 60 anos concedida en 2013 polo Goberno en funcións de Mariano Rajoy. Segundo indica, a Audiencia Nacional "só atendeu un deles", referido ao artigo 32 da Lei de Costas, resolvendo e indicando que a factoría de Ence podía estar situada noutro espazo, o que anularía a prórroga.
Entre os outros cinco motivos que quedaron sen analizar, sostén que figura a vulneración da lexislación ambiental autonómica no referido ao Plan de Ordenación do Litoral e as Directrices de Ordenación do Territorio. Ademais, asegura que tampouco se tivo en conta que a decisión da continuidade de Ence na ría de Pontevedra fose tomada por un Goberno en funcións.
Outro dos argumentos que contempla o recurso de amparo presentado agora consiste na comprobación de que a sentenza do Supremo vai en contra da doutrina do propio Tribunal Constitucional, considerando o artigo 32 en anteriores sentenzas sobre as concesións en terreos de dominio público marítimo-terrestre. Para o Goberno local de Pontevedra, Ence segue sen xustificar que a localización actual en Lourizán é a única na que pode desenvolver a súa actividade industrial.
Segundo o rexedor municipal, o Tribunal Constitucional terá agora un prazo de dous a tres anos para ditar sentenza, en caso de admitir este recurso. No caso de que fose rexeitado, Fernández Lores asegurou que acudirá a Europa co obxectivo de seguir loitando pola defensa da ría e a súa recuperación ambiental, revertindo unha prórroga que cualificou de "inxusta".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.