A Delegación do Goberno, dirixida polo sindicalista Pedro Blanco, prohíbe manifestarse aos bombeiros

O Comité de Folga dos Consorcios Provinciais de Extinción de Incendios e Salvamento de Galicia, tivo que renunciar a realizar unha manifestación polas rúas de Santiago ante a negativa dada pola Delegación do Goberno, da que é titular o sindicalista da UGT Pedro Blanco Lobeiras. O motivo, a coincidencia coa Reunión Informal de Ministros de Economía da Unión Europea en Santiago.

Estes máis de 500 profesionais que levan meses de mobilizacións tiveron que modificar esta convocatoria pola dunha concentración que terá lugar os próximos días 15 e 16 na capital galega.

Os traballadores, que notificaron en tempo e forma por vía telemática a súa intención de manifestarse polas rúas de Compostela, terminando o percorrido na Cidade da Cultura (espazo no que terá lugar o cumio da UE), recibiron unha comunicación telefónica informal da Subdelegación do Goberno en Santiago de Compostela, indicando que o exercicio do dereito fundamental a manifestarse, recollido na Constitución Española, éralles denegado.

Con todo a día de hoxe, no Comité de Folga, non teñen contestación oficial respecto diso e por tanto entenden que o silencio administrativo neste caso (que resulta estimatorio) segue vixente, polo que a mobilización segue en pé, variando a postura inicial, que era de manifestación a concentración.

Este movemento sindical, é o primeiro dos moitos que o colectivo espera ter que dar, á vista da difícil situación que atravesa o sector os Bombeiros de Galicia, que levan en folga desde o día 15 de xuño e enfrontados con Xunta e deputacións polo peche de diferentes centros de traballo.

REACCIÓN DA XUNTA

O vicepresidente primeiro e conselleiro de Presidencia, Xustiza e Deportes, Diego Calvo, trasladou a súa confianza en que poida existir, de cara ás reunións convocadas esta semana entre as partes, un acordo que poña fin á folga de bombeiros comarcais.

A preguntas dos xornalistas, delegou a resolución deste asunto nos consorcios que xestionan estes parques. "É unha competencia dos concellos de máis de 20.000 habitantes e dos de menos de 20.000 son as deputacións as que teñen que levar a cabo estas funcións".

"A Xunta está a colaborar, formamos parte dos consorcios e achegamos unha partida importante, case o 50%, para que o servizo funcione", apostilou. Ademais, recalcou que deputacións e Xunta fixeron unha "proposta" aos bombeiros "que nun principio foi aceptada e logo rexeitada", sentenciou.

"Espero que se poida chegar a un acordo", apostilou Calvo, para quen "habería que analizar moitos asuntos e ver a porcentaxe de absentismo nalgúns parques". "Espero que a proposta se poida aceptar e solucionar canto antes", apostilou ao aludir á feita por algún consorcio.

Pola súa banda, o comité de folga dos consorcios provinciais informou da súa intención de convocar concentracións en Santiago de Compostela os días 15 e 16 de setembro, coincidindo coa reunión informal de ministros de Economía da Unión Europea.