Dous menores trasladados ao hospital de Cee despois de que envorcaran cunha lancha inchable en Fisterra
Ambos levaban chaleco salvavidas e un familiar dun deles internouse no mar para auxilialos, pero ningún do tres era capaz de alcanzar a beira nun primeiro momento.
Por E.P. | SANTIAGO DE COMPOSTELA | 20/08/2023 | Actualizada ás 19:49
Dous menores tiveron que ser evacuados este domingo tras envorcar a lancha inchable coa que navegaban na praia de Langosteira, no municipio coruñés de Fisterra.
Segundo informou o 112 Galicia, o suceso produciuse sobre as 16,30 horas. Nese momento un particular que estaba no areal alertaba á central de emerxencias explicando que a lancha envorcara a varios centos de metros da liña de costa.
Ambos levaban chaleco salvavidas e un familiar dun deles internouse no mar para auxilialos, pero ningún dos tres era capaz de alcanzar a beira nun primeiro momento.
Así, o 112 mobilizou un operativo no que participaron os servizos sanitarios, Salvamento Marítimo, o Servizo de Gardacostas de Galicia, a Garda Civil e os voluntarios de Protección Civil da localidade.
Finalmente, os dous menores conseguiron saír polos seus propios medios, mentres que o pai foi asistido por outros bañistas. Os nenos foron evacuados ao Hospital Virxe da Xunqueira de Cee.
