Grande emoción en Pontevedra co triunfo de Teresa Abelleira, a súa veciña campioa do mundo de fútbol
Tamén en Poio, onde Teresa Abelleira xogou no equipo de fútbol sala Poio Pescamar antes fichar polo RC Deportivo, instalouse unha pantalla xigante na que centos de persoas seguiron o encontro este domingo.
Por Europa Press / Redacción | SANTIAGO DE COMPOSTELA | 20/08/2023 | Actualizada ás 15:59
A cidade de Pontevedra saíu este domingo ás rúas a animar á selección feminina de fútbol e, especialmente, á súa veciña Teresa Abelleira (Pontevedra, 2000), nova campioa do mundo. Cunha pantalla xigante instalada na Praza da Ferrería, os pontevedreses vibraron durante os máis de 90 minutos que durou a final que converteu a España en campioa do mundo tras gañar 1 a 0 á selección de Inglaterra.
Entre os asistentes, os avós da número 3 do combinado español, que deixaron atrás os nervios e celebraron este triunfo xunto a outros familiares e cos centenares de afeccionados que acudiron á praza pontevedresa para seguir esta final.
Tamén en Poio, onde Teresa Abelleira xogou no equipo de fútbol sala Poio Pescamar antes fichar polo RC Deportivo, instalouse unha pantalla xigante na que centos de persoas seguiron o encontro este domingo.
O alcalde da localidade, Anxo Moldes, que estivo acompañado polo presidente da Real Federación Galega de Fútbol (RFGF), Rafael Louzán, celebrou o "orgullo" que supón que Abelleira sexa campioa de mundo. "Xa é parte da historia e unha referente. Estamos a desexar recibila no concello como se merece", manifestou.
E na Coruña, onde a futbolista pontevedresa formou parte do RC Deportivo antes de dar o salto ao Real Madrid, tamén se congregaron multitude de persoas para seguir o partido na Praza de María Pita.
Noutros lugares de Galicia, bares e terrazas enchéronse este domingo para ver este partido histórico que concluíu da mellor das maneiras, coa selección feminina inscribindo a súa primeira estrela de campioas do mundo encima do escudo.
Así mesmo, o presidente da Xunta, Alfonso Rueda, felicitou á selección feminina de fútbol por este título "coa presenza de Teresa Abelleira en nome do deporte galego". "A selección feminina de fútbol volveu a demostrar hoxe o esforzo, traballo e grandísimo talento que temos no noso deporte feminino. Sempre fostes gañadoras, agora tamén campioas. Felicidades!", expresou o presidente do Goberno galego en redes sociais.
