Ferrol presenta uns orzamentos de case 80 millóns de euros, cun incremento do 21% segundo o alcalde

O alcalde de Ferrol, José Manuel Rey Varela (PP), desvelou este luns os detalles do proxecto de Orzamento Municipal para 2023, que "chega a un total de 78.865.879,85 millóns de euros, o que supón un incremento do 21,30% con respecto ao orzamento inicial do ano e dun 20,87% respecto do orzamento inicial de 2022".

Así o detallou tras ser aprobado en Xunta de goberno local e ser presentado aos grupos da oposición, detallando que o orzamento "é o principal instrumento da Administración" para o desenvolvemento das súas políticas públicas e "unha dos seus principais características é a súa presentación e aprobación anual".

O rexedor popular detallou que "Ferrol tivo en oito anos só dous orzamentos e a principal consecuencia de renunciar a facer un orzamento" foi "o non adecuar ingresos e gastos, minguar as posibilidades de incrementar recursos humanos municipais, non incorporar novas previsións para a mellora dos servizos públicos, ademais de renunciar a optimizar os instrumentos que incentiven a actividade económica e a xeración emprego".

CUMPRIR AS SÚAS PROMESAS

Segundo Rey Varela, a través deste orzamento, cúmprese "a palabra dada aos ferroláns" e sentan "as bases do proxecto de cidade nacido das demandas de todos". Máis en concreto, detallou que se destinarán 10,3 millóns de euros a "iniciar as actuacións e proxectos comprometidos e incorporalos a unha planificación plurianulizada a catro anos".

Pola súa banda, a edil de Facenda, Susana Sanjurjo, detallou que "este orzamento permitirá atender ao proxecto de cidade deseñado cos ferroláns" e dixo que, por exemplo, "non se soben nin as cotas nin os tipos de gravame das taxas e impostos municipais". Ademais, redúcese a previsión de ingresos por impostos indirectos e directos e redúcese o importe das multas, que se estima que baixen nos próximos meses tras a desactivación das cámaras de tráfico das rúas Terra e Rubalcava.

Ademais, detallou que "Ferrol precisa do esforzo investidor non só do Concello, senón tamén da Deputación da Coruña, da Xunta e do Estado", e por iso este documento rexistrará "un incremento do 19,8% de transferencias correntes doutras administracións, que suman 25,8 millóns de euros".

En canto aos gastos, os de persoal ascenderán a 21,6 millóns de euros, para "incrementar as prazas polo preocupante avance nas vacantes dos últimos anos", recolléndose actualizacións retributivas para empregados e crearanse postos executivos "que permitirán seguir desenvolvendo unha nova organización municipal e dar solución ao déficit de persoal", detallou Sanjurjo.

Tamén está recollido no capítulo de gastos a finalización das obras na rúa Igrexa, a San Francisco ou a demolición da nave provisional do Mercado e darase comezo a outras que non se puideron pór en marcha, como a ampliación do cemiterio de Catabois

NOVO REGULAMENTO ORGÁNICO

O pleno do Concello de Ferrol ten previsto aprobar o novo regulamento orgánico desta administración, que virá substituír ao que está actualmente vixente, que é do ano 1986. Así o asegurou o alcalde tras ser abordado este asunto en Xunta de goberno. Para o rexedor, é necesario que o Concello de Ferrol "conte cun novo regulamento adaptado aos tempos" actuais.

Pola súa banda, o tenente alcalde e concelleiro de Organización Interna, Javier Díaz, detallou que "as circunstancias económicas, sociais, históricas e culturais mudaron moito nos últimos anos", e, por iso, o actual goberno "presenta este regulamento que xa foi adiantado a todos os grupos municipais e que será levado o vindeiro xoves á comisión para o seu ditame", co obxectivo de que poida ser aprobado inicialmente no pleno de agosto.

"Con este regulamento teremos unha administración local moderna e actual, na que se incrementarán os recursos humanos para unha maior eficacia e eficiencia, mellorando así a atención aos cidadáns", dixo Díaz Mosquera.

Entre os principais aspectos están que o regulamento establece unha nova comisión, de Suxestións e Reclamacións, coa finalidade de fomentar a participación cidadá nos asuntos do día a día. Así mesmo, poderanse crear comisións informativas de estudo ou proposta de carácter especial para consulta ou facer seguimento dalgún asunto cuxa importancia así o aconselle.