Rueda fai valer o apoio de Galicia ao PP para defender a Feijóo: "Ten que ir á investidura"
O presidente galego cre que "non se discute o dereito" de Pedro Sánchez a ter vacacións, senón "se é o momento oportuno" agora.
Por Europa Press / Redacción | Santiago de Compostela | 03/08/2023 | Actualizada ás 16:50
O presidente da Xunta, Alfonso Rueda, animou ao líder do PP, Alberto Núñez Feijóo, a acudir á investidura no Congreso dos Deputados no caso de que sexa o candidato proposto polo rei, que é "quen ten a última palabra" unha vez realice as consultas coas formacións políticas tras as eleccións do 23 de xullo.
Preguntado respecto diso na súa comparecencia posterior á reunión semanal do seu Goberno, o mandatario galego dixo non ter "ningunha dúbida" de que Feijóo, quen "gañou as eleccións", ten "todo o dereito do mundo" a "dicir que quere ser presidente do Goberno", tal e como o manifestou nunha carta dirixida ao secretario xeral do PSOE, Pedro Sánchez.
Iso si, Alfonso Rueda lembrou que "quen ten a última palabra", unha vez realizadas as consultas cos líderes das formacións políticas, é o monarca, que é quen ten que elevar a proposta de candidato ao Congreso dos Deputados.
O presidente autonómico aproveitou para reivindicar que Galicia foi a comunidade que "máis apoio porcentual lle deu ao PP (un 43,5 por cento) e, como presidente do PPdeG, animouno "persoalmente" a que acudise á investidura se é chamado como candidato.
VACACIÓNS DE PEDRO SÁNCHEZ
Tamén foi preguntado Alfonso Rueda sobre as críticas ás vacacións e a viaxe persoal a Marrocos realizado esta semana polo presidente do Goberno en funcións, Pedro Sánchez. O líder galego cre que "non se discute o dereito de ninguén a ter vacacións, sobre todo despois destes meses tan intensos"; senón que "o que está en discusión é se é o momento oportuno agora".
Rueda lembrou que, tras o 23J, hai pendente un proceso de investidura, aínda que "non formalmente aberto" aínda --aínda non están constituídas as Cortes Xerais-- e cuestionou que sexa agora "o momento de desaparecer" cando, ademais, se fala de "ameazas de trato de favor dunhas comunidades autónomas en detrimento doutras" en canto ao financiamento autonómico. "Eu, se estivese nesa situación, na que non estou, tomaría outro tipo de decisión", agregou.
En calquera caso, a reunión do Consello da Xunta celebrada este xoves foi a última antes de iniciar un período vacacional no que Alfonso Rueda aproveitará para "facer un pouco de deporte". Pasará "algún día fóra", pero tamén quedará "en Galicia, que se está moi ben", tal e como confesou.
