O PPdeG propón a Baltar e a Rey Varela como senadores por designación autonómica
O ourensán renunciou a seguir á fronte da Deputación provincial e deu paso a un cambio de ciclo despois de 33 anos ligada ao seu apelido.
Por Europa Press / Redacción | SANTIAGO DE COMPOSTELA | 24/07/2023 | Actualizada ás 19:50
O Grupo Popular revelou este luns cales serán os nomes que propón para optar ao Senado en representación de Galicia: o expresidente da Deputación de Ourense e líder provincial do PP, Manuel Baltar; e o alcalde de Ferrol, José Manuel Rey Varela.
A proposta de Baltar chega despois de que este dese un paso ao carón ao renunciar a seguir á fronte da Deputación provincial co fin de facilitar que os populares puidesen conservala, segundo afirmou el mesmo, tras unha campaña municipal marcada polo seu exceso de velocidade e outras polémicas.
A renuncia de Baltar permitiu un cambio de ciclo na institución provincial despois de máis de tres décadas ligadas ao seu apelido (primeiro da man do seu pai, José Luís Baltar, e despois baixo o seu mandato). Agora preside a institución o alcalde do Pereiro de Aguiar, Luís Menor, da órbita de confianza da dirección galega do PP.
O seu xefe de filas no PPdeG, Alfonso Rueda, deu por feito, ademais, que Baltar, quen segue á fronte dos populares na provincia, non optará á reelección no próximo congreso orgánico, cando este sexa convocado. O dirixente ourensán, en todo caso, non pechou esa porta.
REY VARELA RECUPEROU A ALCALDÍA
En canto a Rey Varela, o exconselleiro logrou recuperar a Alcaldía de Ferrol, na que xa estivo no seu día, con maioría absoluta.
Ambos os dirixentes sumaranse aos outros doce senadores populares elixidos nas urnas este domingo. A súa elección terá lugar no pleno extraordinario que se celebrará o vindeiro venres, 28 de xullo.
CURRÍCULOS
José Manuel Rey Varela é licenciado en Dereito e especialista en Liderado de Xestión Pública polo IESE Business School. No ano 2002 entrou na Corporación Municipal de Ferrol, converténdose no concelleiro máis novo e asumindo a portavocía adxunta do Grupo Municipal Popular. Foi concelleiro, alcalde de Ferrol e presidente da Federación Galega de Municipios e Provincias (Fegamp); e conselleiro de Política Social baixo o mandato de Alberto Núñez Feijóo. Nas pasadas eleccións autonómicas de 2020 foi elixido deputado no Parlamento de Galicia, cargo que deixou o pasado mes de xuño para tomar posesión como alcalde de Ferrol.
Manuel Baltar tamén é licenciado en Dereito. Funcionario, entre os anos 1998 e 2001 foi delegado provincial en Ourense da Consellería de Agricultura. Posteriormente foi deputado autonómico baixo as filas do PPdeG. En febreiro de 2012 'herdou' do seu pai a Presidencia da Deputación de Ourense, ata que anunciou que non seguiría no cargo o pasado mes de xuño. En 2010 foi elixido presidente do PP de Ourense, responsabilidade que mantén.
