Pechan outras 13 carreiras nas universidades galegas, entre elas varias de Enfermaría e Enxeñaría

Outras 13 titulacións ofertadas nas universidades galegas pecharon a admisión para o próximo curso 2023/24 tras a cuarta chamada á matrícula.

Así, son xa un total de 123 as carreiras que xa completaron a admisión tras a primeira (71), segunda (29) e terceira (10) chamadas, entre as que se atopaban os graos de Medicina, Biotecnoloxía e Matemáticas.

A Comisión Interuniversitaria de Galicia (CIUG) publicou este luns, 24 de xullo, os resultados desta cuarta chamada á matrícula. En concreto, na Universidade da Coruña (UDC) completouse a admisión en cinco carreiras: Terapia Ocupacional (nota de corte en 8,91); Logopedia (7,78); Arquitectura Técnica (5,07); Ciencias Empresarias (5); e Náutica e Transporte Marítimo (5).

Así mesmo, péchanse en oito carreiras máis na Universidade Vigo en cuarta chamada: Enfermaría-Meixoeiro (11,36); Enfermaría (grao de Pontevedra) (11,1); Enfermaría (campus Ourense) (11,06); Fisioterapia (10,97); Bioloxía (9,59); Química (8,34); Enxeñaría Electrónica Industrial e Automática (7,97); e Enxeñaría en Tecnoloxías Industriais (7,15).

NOTAS DE CORTE

As notas de corte máis altas entre os graos xa pechados mantéñense nas dobres titulacións de Matemáticas e Física (13,4 sobre 14), e en Enxeñaría Informática e Matemáticas (13,000), ambas as na Universidade de Santiago de Compostela (USC).

Seguen a estas, aínda que xa por baixo do 13, as carreiras de Medicina (12,896), Odontoloxía (12,68), Biotecnoloxía ((12,6) e os dobres graos en Educación Infantil e Primaria (12,494) e Xornalismo e Comunicación Audiovisual (12,372), tamén impartidos pola USC.

Estudantes esperan antes de comezar as probas de acceso á universidade 2022 | Fonte: Álvaro Ballesteros