Tres neofalantes de Ourense, Narón e Noia relatan nunha webserie o seu día a día
A webserie 'O gran reto. 24/7 en galego' deixa ver a tres mozos castelán falantes, de entre 18 e 26 anos, que se comprometen a desenvolver integramente o seu día a día en galego durante tres semanas.
Por Europa Press / Redacción | SANTIAGO DE COMPOSTELA | 11/07/2023 | Actualizada ás 19:35
A webserie 'O gran reto. 24/7 en galego' retrata o día a día de tres protagonistas 'neofalantes' procedentes de Ourense, Narón e Noia. Os episodios forman parte da campaña 'É túa. Pásaa!' e pode verse a través da canle da asociación Alingua (Asociación de Entidades Locais pola Lingua Galega) en Youtube.
Este proxecto recolle a transición como novos falantes do idioma galego de Nelu Vilela, Darío Mares e Martiña Pérez. Son tres mozos castelán falantes, de entre 18 e 26 anos, que se comprometen a desenvolver integramente o seu día a día en galego durante tres semanas.
A serie busca contactar coas novas xeracións e forma parte da campaña de Alingua, posta en marcha o pasado mes de abril, para promover e dinamizar o uso da lingua galega.
Alingua é unha entidade conformada por 19 entidades locais. Forman parte os municipios de: A Baña, Ames, A Coruña, Betanzos, Carballo, Cedeira, Ferrol, Moaña, Narón, O Grove, Ponteceso, Pontevedra, Redondela, Ribadeo, Rois, Santiago de Compostela, Teo e Vilagarcía. Así mesmo, a Deputación de Pontevedra súmase en calidade de integrante amiga.
