Por Europa Press / Redacción | SANTIAGO DE COMPOSTELA | 04/07/2023 | Actualizada ás 19:59
O Tribunal Supremo rexeitou os incidentes de nulidade presentados polo Concello de Pontevedra e a Avogacía do Estado contra a resolución xudicial que avalou a permanencia de Ence nos terreos de Lourizán, na ría de Pontevedra, e que, en concreto, ían dirixidos á concesión da prórroga.
Segundo confirmaron a Europa Press fontes das partes, a sección quinta da Sala do Contenciso-Administrativo do alto tribunal comunicou este martes ás partes afectadas a resolución adoptada, na que se apunta que non procede a nulidade do fallo anterior. Esta resolución pecha a vía aberta ante o Supremo, pero segue aberta a posibilidade de continuar ante o Tribunal Constitucional.
En febreiro deste ano, a sección quinta da Sala do Contencioso-Administrativo do Tribunal Supremo estimou os recursos presentados por Ence e outras entidades contra as sentenzas da Audiencia Nacional que anularon a prórroga que determinaba a continuidade da factoría na ría de Pontevedra ata o ano 2073.
Con esta decisión, corrixiu a sentenza da Audiencia Nacional, que anulara a prórroga concedida o 20 de xaneiro de 2016 polo Goberno que dirixía entón Mariano Rajoy, que outorgaba a Ence unha prórroga de 60 anos (a contar desde a data de solicitude, en 2013) da concesión de ocupación dunha franxa de dominio público marítimo terrestre destinada á fábrica de pasta de celulosa en Pontevedra.
Nesa resolución de febreiro, o Supremo considera que se poden prorrogar as concesións anteriores á Lei Xeral de Costas de 1988, como é o caso, "sempre que consten informes ambientais favorables". No asunto analizado, remarca, "constaban informes favorables da Administración nesa materia".
NOVOS PASOS
Pola súa banda, o Concello de Pontevedra asegurou que estuda o seguinte paso xudicial para "seguir loitando" contra a permanencia de Ence na ría unha vez que o este martes tivo coñecemento do auto do Tribunal Supremo no que rexeita os incidentes de nulidade presentados por esta Administración local e pola Avogacía do Estado contra a sentenza que concede a permanencia de Ence en Lourizán ata 2073.
Ademais, o Concello de Pontevedra, no que actualmente goberna en minoría o BNG con Miguel Anxo Fernández Lores como alcalde, sinala que esta decisión do Supremo tamén é contraria aos intereses municipais tal e como foi a sentenza. Respecto diso, o Concello de Pontevedra entende que "a resolución era previsible e incluíase dentro da folla de ruta xudicial elaborada polo Concello", para "seguir loitando coa permanencia de Ence na ría e en Lourizán".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.