A Xunta destina 200.000 euros á tradución ao galego de obras literarias

O 'Plan de impulso do libro galego' recibiu un achegue de 200.000 de euros da Xunta para a tradución de obras literarias da lingua galega a outros idiomas, ademais de tamén fomentar a publicación en galego de obras escritas noutros idiomas. A Consellería de Cultura, Educación, FP e Universidades informou da nova convocatoria de axudas para o sector editorial coas cales a Xunta apoia os traballos de tradución.

De acordo co Goberno autonómico, as axudas teñen como obxectivo apoiar ás empresas editoriais galegas para que "conten con vías de proxección internacional da súa produción, á vez que se favorece o acceso dos galegos a títulos significativos producidos noutros idiomas en lingua galega".

Ademais, as axudas son de concorrencia competitiva e sufragan os custos de tradución das diferentes obras literarias en formato papel ou dixital, e o importe máximo por obra será de 6.000 euros. Este apoio está dirixido ás persoas físicas ou xurídicas que acrediten a súa condición de editoras.

Así mesmo, os interesados poden solicitar só unha subvención de tradución para un mesmo título e cada empresa poderá presentar solicitude para a tradución dun máximo de 15 obras. Segundo o regulamento, serán obxecto de subvención as obras para unha primeira tradución ou aquelas que pasasen máis de 20 anos desde a última tradución.

Entre os criterios de valoración para a concesión figuran o interese cultural da obra, en función de se o orixinal é dun autor galego ou non, a traxectoria profesional do tradutor, a extensión da tradución e as características da mesma (se se trata doutros idiomas ao galego, viceversa e se son obras dun autor clásico ou non), entre outros.

Libros | Fonte: Xunta de Galicia.