UGT cualifica de "miserable infradotación" os recursos da Xunta para introducir o coordinador de convivencia
Tamén cuestiona este sindicato que sexan as direccións dos colexios e institutos as que teñan que escoller quen se encargará destas tarefas de entre os docentes.
Por E.P. | SANTIAGO DE COMPOSTELA | 15/06/2023 | Actualizada ás 15:59
UGT critica o borrador de orde presentada pola Xunta na Mesa Sectorial do martes para introducir, a partir do próximo curso, a figura do coordinador de benestar e convivencia nos centros educativos. O sindicato cre que é "un paripé" para cumprir coa lei estatal, dada a "miserable infradotación" que propón a Administración para introducir este rol.
A través dun comunicado, e en termos similares ao resto de organizacións representadas na mesa (CIG, CCOO e ANPE), UGT advirte que esta figura leva un "incremento importante da carga de traballo" para o que non ve unha solución nas dúas horas complementarias fixas que contempla a proposta da Consellería de Educación. Neste sentido, a central explica que "outras comunidades" o que fixeron foi liberar tres sesións do horario lectivo.
Ademais, a pesar de que o borrador inclúe a posibilidade de que estes coordinadores perciban o complemento específico de titores, UGT lembra que esta contía xa a cobra "case o 100% do profesorado por outras funcións". Por iso, solicita que se remunere cun complemento concreto a maiores --sen retirar o de tutoría--.
Tamén cuestiona este sindicato que sexan as direccións dos colexios e institutos as que teñan que escoller quen se encargará destas tarefas de entre os docentes e reclama que sexa a Consellería quen faga este nomeamento "con dotación de novo persoal".
"O demostrado gran compromiso dos nosos docentes levounos, e séguenos levando, a asumir o aumento de cargas e responsabilidades sen as correspondentes contrapartidas. A Administración, abusando sempre da vocación docente, precisa respectar, precisa tomar nota do malestar que está a traer", conclúe o comunicado.
