Rueda critica a Sánchez por poñer as eleccións xerais no medio dunha ponte festiva

O presidente da Xunta e do PPdeG, Alfonso Rueda, criticou a convocatoria de eleccións feita por parte do presidente do Goberno, Pedro Sánchez, a quen acusou de levar aos españois ás urnas en pleno verán por interese propio. Ademais, remarcou que son durante a "ponte de Santiago", polo festivo do 25 de xullo en varios territorios --entre eles en toda Galicia, pero mostrouse seguro de que ese día volverá "o sentidiño" a España --por unha vitoria do PP de Alberto Núñez Feijóo-- con quen será "reivindicativo" como co actual xefe en Moncloa.

Na sesión de control ao goberno deste mércores, Rueda aproveitou a pregunta formulada polo portavoz do PSdeG na Cámara, Luís Álvarez, para sacar peito dos resultados dos populares en Galicia, que soben pero menos que a media estatal, algo que lle lembrou o deputado socialista na súa intervención, na que tamén afirmou que o Goberno galego estaba preavisado por se tamén se sumaban ás eleccións xerais as autonómicas e tremíanlle " as pernas".

"Está claro que as urxencias que tiñan o luns pola tarde non son as mesmas que teñen hoxe", acusou Luís Álvarez, a quen Rueda respondeu subliñando que el se "alegra" de "evitar levar a Galicia" a unhas eleccións no verán, porque ten "estabilidade" no seu goberno. Ao tempo, augurou que a xente "coñece dabondo" aos socialistas e por iso "non lles vai confiar" de novo o goberno.

"Quedan dous meses", augurou Alfonso Rueda ao presidente do Goberno central, cuxo substituto se mostrou seguro de que será Feijóo, sen dicilo explicitamente, pero con referencias veladas como a chegada do 'sentidiño', lema da Xunta que se amplificó máis durante a pandemia da covid xestionada polo dos Peares en Galicia. "Seguiremos sendo reivindicativos co novo presidente de España", abundou Rueda.

O presidente da Xunta, Alfonso Rueda, no pleno do Parlamento posterior ás eleccións do 28M | Fonte: DAVID CABEZON @ XUNTA