Ethel Vázquez cualifica de "manobra política" o nomeamento do Comisionado do Corredor Atlántico polo Goberno central
Respecto da transferencia da AP-9, sorpréndelles o cambio de criterio dos socialistas.
Por E.P. | SANTIAGO DE COMPOSTELA | 29/04/2023 | Actualizada ás 19:54
A conselleira de Infraestruturas e Mobilidade, Ethel Vázquez, tachou de "manobra política" o nomeamento por parte do Goberno central do Comisionado para o Corredor Atlántico, co que explicou que pediu unha reunión "coa calada por resposta".
Tal e como explicou nunha entrevista concedida a Radio Galega e recollida por Europa Press, solicitaron unha reunión para abordar os retos que supón o corredor e aínda non recibiron resposta. "Estamos igual que fai catro anos", lamentou.
A este respecto, Ethel Vázquez comentou que ao Executivo galego sorprendeulle o "primeiro esbozo" con 1.300 millóns de euros para o corredor, "un investimento que nin chega para resolver o lazo do Manzanal". "É insignificante para as necesidades do corredor, que temos identificadas en 8.000 millóns de euros", apuntou.
"Iso chegaría para unha conservación ordinaria e non o que buscamos, a renovación e a transformación", insistiu. Tamén en canto a conexións ferroviarias, a responsable de Infraestruturas volveu a insistir en que descoñecen aínda as datas concretas nas que chegarán a Galicia os trens Avril. "Seguimos esperando. É atraso sobre atraso. Un rosario de incumprimentos", afirmou.
Tamén criticou a actitude do Executivo cental respecto da reconstrución do viaduto da A-6, que cualificou de algo "rocambolesco". "Só se tramita pola vía de emerxencia a metade do viaduto, coma se só necesitásemos a metade. É de xustiza que se repare simultaneamente, xa que non é só unha cuestión de competitividade, senón tamén de seguridade viaria", censurou, insistindo ademais en que "todo o que prometeu" o Goberno é "papel mollado".
TRANSFERENCIA AP-9
Respecto da transferencia da AP-9, sorpréndelles o cambio de criterio dos socialistas. "No Parlamento de Galicia houbo unanimidade para pedir a transferencia da AP-9. O PSOE votou a favor. E á hora da verdade vemos un bloqueo no Congreso. Desde a Xunta insistimos en que non hai escusas para o bloqueo. É viable esa transferencia", argumentou.
Nesta liña, cualificou de "insulto aos galegos" que o Goberno central e Audasa reclamen 45 millóns de euros polas peaxes de Rande e A Barcala. "É un insulto que decidan pleitear. Xa hai varias sentenzas que sosteñen que a Xunta non ten que pagar. O Ministerio de Transportes ten o deber moral de revisar á baixa o acordo con Audasa", indicou.
FOLGA TRANSPORTE DE VIAXEIROS
Noutra orde de cousas, a conselleira defendeu o camiño "do diálogo e a negociación" para achar unha solución no conflito entre patronal e traballadores do transporte de viaxeiros. "Evitouse a folga destes días, pero hai unha indefinida para o 8 de maio. Esperamos o acordo", comentou.
"Vimos de facer un esforzo sen precedentes no mes de abril cunha inxección de 16,5 millóns de euros que se suma aos 45 millóns de euros dos dous últimos anos. Un investimento extraordinario, 60 millóns de euros ao sector do transporte para garantir a súa viabilidade. Apelo á responsabilidade do sector, dos empresarios para que alcancen ese acordo definitivo cos representantes dos traballadores e poidan recuperar ese poder adquisitivo, que é a demanda", explicou.
