Estas foron as preferencias dos turistas que visitaron Galicia en Semana Santa

A ocupación no sector turístico galego durante a Semana Santa situouse entre o 75 e o 85%, unhas cifras similares ás rexistradas no ano 2019, co Camiño de Santiago e o turismo rural como as opcións máis demandadas.

Así o reflicten os datos feitos públicos este martes polo Clúster Turismo de Galicia, que destaca que as boas condicións meteorolóxicas "favoreceron as reservas de última hora, incrementando as porcentaxes de ocupación durante as xornadas festivas".

O perfil maioritario do turista que se achegou a Galicia foi de orixe estatal, aínda que nalgúns destinos, como Santiago de Compostela e A Coruña, a proporción do turista internacional "foi superior á media". O Camiño de Santiago e o turismo rural, especialmente en zonas como a Ribeira Sacra, a Costa da Morte e O Courel, rexistraron boas cifras de ocupación e "a notable afluencia de peregrinos beneficiou aos aloxamentos rurais localizados ao longo da Ruta Xacobea".

ANÁLISE POR ZONAS

En canto á análise por zonas, destaca o Clúster, tanto na provincia de Pontevedra como na cidade de Pontevedra a ocupación media situouse ao redor do 75% para toda a semana, dato que se achega ao 80% o xoves, venres e sábado.

Cifras similares recóllense na área de Vigo, onde se rexistrou unha ocupación media do 70% para toda a semana e do 80-85% entre o xoves e o sábado. Tamén en Baiona esta porcentaxe aproximouse ao 80% durante os días festivos. En Sanxenxo a ocupación alcanzou o 77,98%, aínda que foi superior en hoteis de catro e cinco estrelas.

Na cidade da Coruña cumpríronse as previsións para estas datas, alcanzando unha porcentaxe do 80% de ocupación hoteleira e en Santiago de Compostela a taxa de ocupación situouse nun 75% para o conxunto da cidade entre o xoves e o domingo, dato que aumenta ao considerar os establecementos localizados no conxunto histórico.

Pola súa banda, a provincia de Lugo remata a Semana Santa superando as previsións para estes días. A cidade de Lugo alcanzou o 84% de ocupación, dato que aumenta ata o 89% na zona da Mariña.

Tamén na Ribeira Sacra superáronse os prognósticos, con rexistros uns 6% superiores aos recolleitos durante os días previos á Semana Santa, superando o 90% de ocupación nos días festivos. Finalmente, en Ourense alcanzouse o 80% de ocupación durante estes días. O presidente da Xunta, Alfonso Rueda, volveu a eloxiar este martes as "cifras espectaculares" de ocupación hoteleira que deixou a Semana Santa en Galicia, que cualificou de "fantásticas".

PEREGRINOS

O Camiño de Santiago está a alcanzar "cifras marca" de peregrinos, "moi por encima das do ano pasado" e supera xa nun 78% a cifra de camiñantes chegados a Compostela no mesmo período de 2022. Así o reflicte nunha comunicado a Xunta de Galicia, que aplaude os resultados alcanzados polo sector turístico galego durante a Semana Santa, cunha ocupación media do 85% e picos con cheo total nalgunhas áreas.

No que se refire particularmente ao Camiño de Santiago, a estas alturas do ano chegaron a Galicia máis de 31.000 peregrinos, apunta Turismo de Galicia, o que supón un 78% máis que no mesmo período do ano pasado, ano Xacobeo. Case a metade destes camiñantes chegaron no mes de abril, que tradicionalmente marca o arranque da tempada alta coa Semana Santa.

Tamén en relación á Semana Santa, a Unión Profesional de Traballadores Autónomos destacou os bos resultados da pequena hostalaría galega, cunha facturación "similar á de anos prepandémicos". Segundo os seus datos, o 87% dos establecementos manifesta aumentar a súa facturación con respecto ao pasado ano nun 30% e o 76% dos locais de restauración facturou case un 37% máis, especialmente os locais de bebidas.

En canto aos pequenos establecementos de hospedaxe, "a maioría deles comentan ter practicamente a mesma ocupación que no ano 2019, sobre todo nos dedicados ao turismo rural", destacan desde UPTA. No entanto, a maioría destes establecementos consideran que o "principal problema" ao que se enfrontan para a recuperación dos seus negocios é a "competencia desleal" dos apartamentos turísticos.