Denuncian "acoso laboral" en DomusVi: "impera o machismo e o amiguismo"
Traballadoras aseguran que a situación é coñecida polos responsables superiores e din que levarán o asunto aos tribunais.
Por Europa Press / Redacción | SANTIAGO DE COMPOSTELA | 15/03/2023 | Actualizada ás 13:43
A responsable do sector de residencias privadas do sindicato CIG en Ferrol, Beatriz Fernández González denunciou que as traballadoras de dúas residencias da empresa DomusVi, a de Esteiro, en Ferrol e a de Laraxe, en Cabanas (A Coruña); están a sufrir "acoso laboral" e que, por iso, levarán o asunto aos tribunais.
Nunha rolda de prensa ofrecida na mañá deste mércores no local comarcal do sindicato en Ferrol, Fernández estivo acompañada por delegadas sindicais de ambas as residencias, que a día de hoxe ten aproximadamente un centenar de empregados en cada unha delas.
"Queremos deixar constancia do noso malestar pola actitude dos responsables da dirección e organización dos centros", sinalou Beatriz Fernández, que denunciou que se "forza" ás traballadoras "a soportar unha carga de traballo e un nivel de tensión, non só físico, senón tamén psicolóxico, inaceptable".
No caso das instalacións de Ferrol, acusaron de "despotismo á coordinadora do centro". Segundo denunciou, esta responsable "dedícase a insultar, berrar e menosprezar aos traballadores". Ante isto, afirmou que desde a dirección, "non quere ou non pode pór freo a esta situación, sufrindo os traballadoras as súas desquicies".
ACOSO SINDICAL
No referente á residencia DomusVi de Laraxe, segundo Fernández, "a gravidade do acontecido é tal" que decidiron dar o paso de presentar denuncias "por acoso sindical e laboral contra os responsables do centro". Acusan o director de dirixir o centro "como o seu casarío", onde "o machismo e o amiguismo impera" e que fai que "o clima de traballo sexa insoportable, segundo sexas afín ou non á empresa".
A CIG sostén que a situación de ambos os centros "é coñecida e consentida pola directora rexional de RRHH e polo director territorial de operacións". "Non imos tolerar estes abusos e denunciaremos pública e xudicialmente esta situación", detallou.
