Luz verde á ordenación dun núcleo rural con preto de 20 hórreos en Dumbría

A Dirección Xeral de Calidade Ambiental deu luz verde á delimitación como núcleo rural e a ordenación do asentamento de Anseán, na parroquia de Buxantes, municipio de Dumbría (A Coruña).

Dumbría recorre a esta figura para evitar a inseguridade xurídica en cuestións como futuras obras, xa que o municipio non conta con Plan Xeral de Ordenación Municipal (PXOM), que está en tramitación. Deste xeito, o Goberno galego resolve que non é necesario un procedemento ordinario de avaliación ambiental ao non detectar "efectos ambientais adversos significativos".

Este núcleo rural abarca 7,7 hectáreas de superficie, onde existen 37 parcelas edificadas e poderíanse edificar outras 32. Así, diferénciase unha parte tradicional e outra común. En concreto, proponse a catalogación dun total de 17 hórreos, aínda que se identifican outro catro hórreos e un lavadoiro nunha zona próxima. A contorna é de carácter rural, ocupado fundamentalmente por terreos de cultivo e masas forestais de repoboación.

Hórreo e casas tradicionais na aldea de Vilarxubín, unha das poucas aldeas galegas que conserva a etnografía tradicional | Fonte: Sonia García-eiradepedra.blogspot.com