A Deputación de Pontevedra reclama á Xunta axudas para os afectados polos temporais do pasado decembro
Lembraron que por ser unha emerxencia autonómica, correspóndelle á Xunta traballar nela e remitir un informe ao Goberno central.
Por E.P. | SANTIAGO DE COMPOSTELA | 15/01/2023 | Actualizada ás 15:11
O Goberno da Deputación de Pontevedra reclamou á Xunta de Galicia que saia do seu "clamoroso silencio" e poña en marcha axudas para afrontar os danos causados polos temporais do pasado Nadal, que afectaron a concellos, persoas e empresas da provincia.
Así, segundo trasladaron nun comunicado, no próximo pleno ordinario do día 27 debaterase unha moción asinada polos grupos provinciais do PSdeG-PSOE e do BNG na que solicitarán a "inmediata" aprobación da declaración da Emerxencia de Interese Galego e do Decreto regulador das axudas coa habilitación dos créditos necesarios.
No texto, a Deputación insiste en que os fondos autonómicos deben de ser "obxectivos, transparentes e suficientes" para non repetir os erros das crises dos incendios en agosto de 2016 e a pandemia entre 2020 e 2021.
Ademais, lembraron que por ser unha emerxencia autonómica, correspóndelle á Xunta traballar nela e remitir un informe ao Goberno nacional cos datos detallados dos danos provocados polos temporais.
Nesta liña, a moción destaca que das 400 incidencias rexistradas o 1 de xaneiro case a metade tiveron lugar na provincia de Pontevedra, especialmente nos concellos do sur, que segundo afirman desde a deputación, parecen "condenados" a facer fronte en solitario á "factura".
Finalmente, recalcaron que, independentemente ás subvencións a fondo perdido do Estado ás que pode acceder a cidadanía, "é necesario" que a Xunta active os fondos propios extraordinarios co amparo legal da figura da declaración de Emerxencia de Interese Galego e trate de impulsar a declaración estatal de Zona Afectada Gravemente por Emerxencia.
