Folgoso do Courel reclama axudas para as segundas vivendas e pon o foco nas "especiais dificultades" da hostalaría tras a vaga de incendios
O Concello pide que se considere o "papel fundamental" para o municipio destes fogares.
Por Europa Press / Redacción | SANTIAGO DE COMPOSTELA | 02/09/2022 | Actualizada ás 18:29
O Concello de Folgoso do Courel reclama o Goberno central unha ampliación nas axudas para os afectados polos incendios en segundas vivendas. Así se acordou no pleno celebrado este venres no municipio lucense. Por parte do goberno local demándase que as axudas non se "limiten" aos inmobles cualificados como primeira vivenda e que se teña en conta o "papel fundamental" que desempeñan moitas segundas residencias no concello rural.
A alcaldesa de Folgoso, Lola Castro, explica que "hai moitas persoas que emigraron para volver e xubilarse aquí, veciños e veciñas que estaban a acondicionar as súas casas para o futuro e que agora están prexudicados". Fala tamén de construcións auxiliares danadas, "por exemplo as cabanas agrícolas ou palleiras que deberían recibir algún tipo de axuda para a súa reparación".
A rexedora, ademais, pon o foco nas "especiais dificultades" nas que está o sector da hostalaría. "Hai empresas turísticas enormemente afectadas, para as que habería que habilitar unha liña de axudas extraordinarias e prestar especial atención para atender á súa delicada situación", reclama Castro.
Así mesmo, o goberno local demanda que o Estado lles comunique a súa decisión sobre a aprobación das medidas aplicadas para as previsións orzamentarias do próximo ano. Solicitan que, no caso de que as axudas "tivesen algún tipo de repercusión tributaria, se habiliten as correspondentes exencións totais".
O goberno presidido pola popular Lola Castro lembra que a vaga de lumes que afectou este verán ao Courel arrasou un total de 11.000 hectáreas con "consecuencias devastadoras" polas que piden se axilicen "na medida do posible" todos os trámites e traballos para a recuperación da superficie afectada.
