A Xunta pide ao Goberno financiamento para o Polo Aeroespacial de Galicia a través do Perte
A Administración demanda que a repartición prevista se realice con transparencia.
Por E.P. | SANTIAGO DE COMPOSTELA | 26/07/2022 | Actualizada ás 18:51
A Xunta defende o papel protagonista que debe ter o Polo Aeroespacial de Galicia no Proxecto Estratéxico para a Recuperación e Transformación Económica vinculado a este sector e solicita o apoio do Ministerio de Ciencia e Innovación para que os proxectos de I+D+i da iniciativa estratéxica do Goberno galego, especializada no segmento dos vehículos non tripulados, conten con financiamento destes fondos europeos.
A directora da Axencia Galega de Innovación, Patricia Argerey, participou este martes en Madrid na reunión sobre o Perte, na que tomou parte a ministra de Ciencia e Innovación, Diana Morant, xunto coas comunidades autónomas, organismos públicos de investigación, así como a organizacións empresariais e sindicais con relevancia no sector, entre outros.
A Administración autonómica galega destacou durante o encontro a necesidade de que a repartición prevista no Perte, fondos que permitirán atraer investimento privado a Galicia, se realice con transparencia, garantindo a igualdade de oportunidades e contando co compromiso do sector na repartición das axudas.
A Xunta sinala o importante peso que ten o sector en Galicia e pon en valor que, no marco do Polo Aeroespacial de Galicia, se investiron 164 millóns de euros en proxectos de I+D+i no segmento dos vehículos e sistemas non tripulados nos últimos cinco anos; e que xa están en execución outros 84 millóns dos 540 previstos na nova planificación estratéxica que se desenvolverá ata 2025.
A Administración autonómica tamén insiste na necesidade de coordinación e de sumar capacidades e esforzos no I+D+i aeroespacial, na que Galicia ten unha posición de referencia en España. O Consorcio Aeronáutico Galego agrupa máis de 40 empresas, centros tecnolóxicos e de coñecemento dun sector de alta tecnoloxía que se foi consolidando nos últimos anos e que en 2021 mantivo o emprego e pechou o exercicio cun incremento de facturación do 6%.
