O Servizo de Protección da Natureza (Seprona) da Garda Civil, en colaboración coa Policía Local de Ames, investiga a un home como presunto autor dun delito de malos tratos animais e abandono.
A investigación actívase por mor da comunicación por parte da Comunidade de Propietarios de veciños onde residía o agora investigado, dun posible abandono dun animal no interior dunha vivenda, xa que levaban meses ouvindo oubear a un can e non vían ao propietario polo edificio.
Unha patrulla do Seprona trasladouse para verificar a veracidade da información recibida. Unha vez pescudado o paradoiro do propietario do animal que se atopaba residindo e traballando en Santiago de Compostela, comprobaron que o animal se atopaba falto de manutención, custodia e vixilancia.
Estaba en estado de caquexia severa e deshidratación no momento da súa exploración dificultando o seu estado a liberdade de movementos, en condicións hixiénicas desfavorables, uñas extremadamente longas e curvadas e un cúmulo de feces.
O animal, unha femia pertencente a unha raza potencialmente perigosa, estaba sometido, segundo a Garda Civil, "a un sufrimento inxustificado", agravándose o seu estado de saúde co trascurso do tempo, correndo risco para a súa vida ao non recibir os coidados necesarios.
A Garda Civil fíxose cargo do animal, cuxo propietario xa fora proposto para sanción polo Seprona por carecer a cadela de identificación a través de microchip, licenza para a tenencia de animais potencialmente perigosos e seguro de responsabilidade civil obrigatorio.
A Garda Civil procedeu á investigación do propietario e as actuacións realizadas foron postas a disposición do Xulgado de Instrución de Santiago de Compostela.