Por E.P. | A Coruña | 26/10/2021 | Actualizada ás 17:10
O consello de goberno da Universidade da Coruña aprobou este martes a metodoloxía para elaborar o Plan Estratéxico da UDC 2022-2026, "que definirá de forma participativa o modelo de universidade para ese período de catro anos", segundo informa o reitorado.
O contexto actual, explica o documento metodolóxico, "caracterizado por unha grande incerteza e por dinámicas de transformación e reconstrución dos paradigmas, debe ser analizado e interpretado coa perspectiva da UDC, a das persoas e estruturas que compoñen a institución, co fin de establecer un horizonte realista e ilusionante para a organización".
A institución, unha vez realizada a diagnose estratéxica e baseándose nela, engade que está en condicións de "definir os obxectivos, tanto de carácter xeral, como táctico e operacional, que a guiarán cara ao modelo de universidade para o período 2022-2026".
O procedemento aprobado establece cinco fases de traballo, sendo inmediata a definición da "misión, visión e valores e a identificación de áreas estratéxicas e constitución de grupos de traballo".
En concreto establécense cinco grupos de traballo segundo as áreas: docencia e aprendizaxe; investigación e transferencia; internacionalización; financiamento e uso eficiente dos recursos, e responsabilidade social e sustentabilidade.
Así mesmo, aprobouse o cambio do nome oficial da Escola Técnica Superior de Enxeñeiros de Camiños, Canles e Portos e usar linguaxe inclusiva, para que o novo nome sexa Escola Técnica Superior de Enxeñaría de Camiños, Canles e Portos. Este acordo ratifica a proposta enviada polo propio centro.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.