Por E.P. | SANTIAGO DE COMPOSTELA | 06/09/2021 | Actualizada ás 17:55
A Asociación Animalista Libera denunciou a "falta de seguridade" das prácticas de caza tras ser evacuado nun helicóptero medicalizado un home que sufriu un accidente mentres realizaba esta actividade en Montederramo.
Nun comunicado, a entidade afirmou que este incidente "evidencia" que "esta actividade é un perigo para os propios participantes" e "un risco para calquera persoa allea ás batidas".
De feito, resaltou que, segundo datos do Goberno central, en 2020 reportáronse polo menos seis persoas feridas en cazarías na provincia de Ourense, que representou a que rexistrou unha maior incidencia en Galicia fronte ás de Lugo e A Coruña, que sumaron dous incidentes recoñecidos.
Así mesmo, advertiu de que a declaración da "emerxencia cinexética temporal" por parte da Xunta no 70% da comunidade supón que "calquera persoa está exposta a un risco maior". Ademais, a asociación reprobou que nestas actividades poidan participar menores e reclamou "unha verdadeira protección para a cidadanía non cazadora" ao Goberno galego.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.