Morre unha muller atropelada en Vila de Cruces

Unha muller faleceu na mañá deste luns tras ser atropelada por un turismo despois de que este chocase cun camión na estrada PO-905, no concello de Vila de Cruces.

O 112 Galicia recibiu a chamada dun particular implicado no accidente que informou do ocorrido e indicou que unha muller estaba ferida. Neses momentos, o alertante xa afirmaba que a persoa estaba a ser atendida, no punto, por persoal sanitario do centro de saúde da vila.

O Servizo de Urxencias Sanitarias de Galicia-061 comunicou a saída cara ao lugar do helicóptero medicalizado con base en Santiago. Tras ter coñecemento desta información, os xestores do 112 Galicia deron aviso á Garda Civil de Tráfico, a Protección Civil de Vila de Cruces, ao GES e ao Servizo de Emerxencias de Lalín.

Tamén foron informados os Bombeiros de O Deza por se fose necesaria a súa intervención. Os servizos sanitarios que atenderon á muller no punto non puideron facer nada por salvarlle a vida.

Segundo confirmaron os membros de Protección Civil ao 112 Galicia, a colisión entre o camión e o vehículo fixo que este último, debido ao impacto, se desprazase cara atrás atropelando á muller.

Ademais, o Centro Integrado de Atención ás Emerxencias de Galicia tamén solicitou a intervención do servizo de mantemento de estradas para realizar a limpeza da vía e garantir así as condicións de seguridade da mesma.