Beiras recoñece agora a "frustración" dos pactos con Podemos porque non había "reciprocidade" con Galicia"
Di que Galicia "non conta, non existe para España porque é unha colonia interna". Tacha aos Borbóns de "peste bubónica" na presentación do novo libro de Pisarello, quen augura que "Felipe VI non poderá manterse".
Por Europa Press / Redacción | SANTIAGO DE COMPOSTELA | 26/06/2021 | Actualizada ás 16:35
O histórico dirixente nacionalista Xosé Manuel Beiras, que liderou AGE en 2012 cunha fulgurante entrada en Parlamento galego e posteriormente estivo á fronte dun proceso que desembocou en mareas municipalistas e En Marea, recoñece a "frustración" de que nas alianzas con Unidas Podemos non se "respondía con reciprocidade" a Galicia.
Así o expuxo este sábado en Santiago, nun acto de presentación do libro 'Deixar de ser súbditos. O fin da restauración borbónica', de Gerardo Pisarello, que Beiras considera unha obra "fundamental para comprender moitas cousas" como as "sucesivas frustracións de procesos de emerxencia da cultura revolucionaria republicana".
De tal forma, explicou que durante a lectura deste libro observaba como "Galicia non conta" para España, "non existe", "non está na historia do Estado español desde o século XVIII". Unha cuestión que achaca a que Galicia "era unha colonia interna do Estado español", de forma que "non ten historia" e "se a ten, hai que negala", "hai que silenciala".
Esta reflexión serviulle para entroncar co último período da súa etapa política, como referente de Anova nun contexto de alianzas con formacións como Unidas Podemos. E é que sinala que é alguén que: "Sempre tivo que superar a frustración de darse conta de que, ao final, non se nos respondía con reciprocidade".
Unha problemática que atribúe a que: "Non eramos iguais, non estamos no mesmo status". Beiras opina que, "subsconcientemente", ocorre "no corpo da maior parte de organizacións", aínda que aprecia que Gerardo Pisarello foi unha das excepcións nese tipo de relacións.
Durante a súa intervención, Xosé Manuel Beiras dixo que é "independendista desde que con 13 anos chegou a casa a noticia da morte de Castelao", pero "nunca" practicou o independentismo na politica debido a que avogou "por tender pontes" a través de alianzas, desde os anos 60 ata a última etapa de mareas municipialistas e En Marea.
Asegura que segue falando con Pisarello de como conseguir "unha gran alianza", pero que salga da sociedade civil, pois "por arriba non funciona". "Aos meus 85 anos resúltame moi difícil crer", sentenciou.
A "PESTE BUBÓNICA" DOS BORBÓNS
Paralelamente, Beiras cargou contra o "horror" da dinastía borbónica, á que tachou de "peste bubónica". Lamenta que non se fixese "tábula rasa" coas institucións franquistas na Transición, dado que "40 e tantos anos despois" vese que as "consecuencias foron letais". Respecto diso, definiu ao rei emérito Juan Carlos I como un "grandísimo delincuente fiscal" que se marchou a un país "no que non existen os dereitos humanos".
Este acto contou coa presenza do exalcalde de Santiago Martiño Noriega, así como diferentes membros de Compostela Aberta, incluída o seu actual portavoz, Marta Lois. Precisamente, Gerardo Pisarello quixo agradecer tanto a Beiras como a Noriega a súa influencia.
Pisarello valorou a Beiras como "un mestre" e como "unha das figuras máis prominentes do republicanismo democrático iberoceltamericano". Tamén dixo que compartiu catro anos duros co seu "irmán" Martiño Noriega, cando este era alcalde de Santiago e Pisarello era primeiro tenente de alcalde en Barcelona --entre 2015 e 2019--.
Por iso, necesitaba este libro como "terapia" para "dicir que o truco non coa". Aquí, citou a Charles Maurice de Talleyrand para afirmar: "É costume real o roubar, pero os Borbóns esaxeran".
Sobre a "frustración" da que falou Beiras, Pisarello lamentou que se os Borbóns "seguen roubando carteiras" é porque "esas tradicións republicanas nunca chegaron suficientemente a estar en contacto entre si". Á pregunta de "por que loitar", Pisarello lembra que Beiras lle dixo no seu día que para loitar "non fai falta ter esperanza", senón que hai que facelo "por simple dignidade". "Lóitase porque non se pode vivir doutra maneira", agrega.
"PERSPECTIVA FEMINISTA" DO LIBRO
Pola súa banda, Marta Lois definiu este libro como "un agasallo" por "a forma, contido e momento" dun "artesán de narrar e contar", nunha obra que "ilumina un futuro para pensar". Igulamente, remarca a "perspectiva feminista" e "anticolonial" deste texto para un "futuro republicano" co que "deixar de ser súbditas".
