A covid disparou a actividade do Valedor do Pobo, cun 28% máis de asuntos tratados
Sanidade e política social centraron a maioría de expedientes da institución, que abriu 33 investigacións de oficio sobre a pandemia.
Por Europa Press / Redacción | SANTIAGO DE COMPOSTELA | 18/06/2021 | Actualizada ás 12:44
A pandemia de covid-19 disparou a actividade do Valedor do Pobo durante 2020, un ano "difícil" no que a institución que encabeza María Dolores Fernández Galiño tramitou un 28% máis de asuntos que en 2019, especialmente a partir do mes de marzo, cando a chegada do virus motivou a declaración do estado de alarma.
Desde ese 14 de marzo de 2020 no que foi declarado o primeiro estado de alarma para facer fronte á crise sanitaria ata o 21 de xuño, día no que decaeu; o Alto Comisionado do Parlamento de Galicia xestionou un total de 222 asuntos relacionados coa pandemia, case a metade do total de expedientes dese período.
Ademais, o Valedor abriu 33 actuacións de oficio durante este período de confinamento que, unha vez superado, mantivo a tendencia á alza no número de asuntos tratados desde a institución ata o final dun ano 2020 que se pechou con incrementos cuantitativos en todos os parámetros de medición da actividade.
Estes datos están recollidos na memoria anual de actividade da institución, que foi presentada en rolda de prensa pola valedora do Pobo, María Dolores Fernández Galiño, tras facer entrega este venres do informe ao presidente da Cámara autonómica, Miguel Ángel Santalices.
Así, os asuntos totais no ano foron 2.912, un 28% máis que en 2019, un incremento similar ao rexistrado no número de persoas que se dirixiron ao Valedor do Pobo para solicitar asesoramento, que creceu un 27% ata os 7.526.
