Por Europa Press / Redacción | SANTIAGO DE COMPOSTELA | 07/06/2021 | Actualizada ás 18:50
O Museo da Catedral de Santiago volverá abrir as súas portas o próximo 24 de xuño, xoves, tras permanecer pechado desde o pasado 15 de novembro por mor da pandemia.
Desta maneira, a partir desa data xa se poderán visitar tanto a colección permanente, como os espazos integrados na visita habitual do museo, tales como o claustro, o Tesouro ou a capela das Reliquias. Tamén se poderá visitar o Pazo de Xelmírez, que alberga o espazo monográfico dedicado ao Mestre Mateo, e a cripta do Pórtico da Gloria, recentemente restaurada.
As entradas xa están á venda a través da plataforma do Museo Catedral na web, na que tamén se achega distinta información sobre as visitas, horarios e tarifas.
Así mesmo, a partir do 24 de xuño retómanse as visitas ao conxunto da igrexa e museo de Santa María de Sar, grazas ao programa Compostela Sacra da Fundación Catedral de Santiago.
No que se refire ao Pórtico da Gloria, a partir desa data convivirán dous sistemas de visitas. Un de pago, que inclúe a aplicación de visita e o acceso ao Museo e Pazo de Xelmírez, e outro gratuíto, previa retirada de invitacións. En ambos os casos, os tickets e invitacións estarán dispoñibles na web de venda de entradas do Museo. O punto de inicio destas visitas será a cripta do Pórtico, con acceso desde a praza do Obradoiro.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.