O 30% de pacientes con cancro de pulmón en fase avanzada carece de síntomas segundo un estudo da USC

Un estudo revela que preto dun 30 por cento dos pacientes que padecen cancro de pulmón en fases avanzadas non presentaba ningún síntoma no momento do diagnóstico.

Trátase dunha das conclusións do traballo coordinado polo profesor Alberto Ruano Raviña, da Universidade de Santiago de Compostela, e o doutor Mariano Provencio, coautor principal da investigación.

Os especialistas analizaron máis de 9.800 casos de pacientes con esta enfermidade diagnosticados entre 2016 e 2019, todos eles procedentes do Rexistro de Tumores Torácicos do Grupo Español de Cancro de Pulmón (GECP).

O 74 por cento dos casos analizados eran homes cunha media de 64 anos de idade, e o estado IV, o máis avanzado, foi o máis frecuente no diagnóstico, un 46,6 por cento.

Entre os síntomas máis habituais nestas fases da enfermidade atópase a tose (33,9%) e a dificultade para respirar (26,7).

No entanto, a investigación detectou que preto do 27,7 por cento dos pacientes non presentaron síntomas no momento de recibir o diagnóstico, unha porcentaxe aínda maior en caso de fases temperás.

Tampouco existen diferenzas en función do historial de tabaquismo do paciente, polo que consideran que a enfermidade non conta con ningún síntoma predominante claro nin sequera en etapas máis avanzadas.

É por iso que a investigación abre a porta a considerar que a falta de síntomas como os mencionados "en ningún caso debe levar á decisión de descartar a presenza desta enfermidade" durante o proceso de diagnóstico.

O cancro de pulmón sitúase, actualmente, como a principal causa de morte por este tipo de enfermidades en España, con máis de 30.000 novos casos diagnosticados cada ano e rexistrando unha alta incidencia e mortalidade

MR-CAT, novo sistema detección cáncer CHUVI