Hablamos Español insiste en que o castelán está "prohibido por decreto" nas escolas galegas
Critican que a Xunta enviara un cuestionario sobre o emprego do galego, no que ven un "adoctrinamento nacionalista" por parte do goberno do PP, a pesar das críticas de Feijóo ao novo decreto do ensino.
Por Galicia Confidencial | SANTIAGO DE COMPOSTELA | 19/11/2020 | Actualizada ás 09:00
Novo episodio de denuncia por parte de Hablamos Español, a plataforma comandada por Gloria Lago que uns meses atrás cargou xa contra a iniciativa da canle xabarín da Mesa. Agora, a organización vén de aproveitar un formulario achegado pola Xunta aos pais dun colexio de Vilagarcía para volver atacar o que eles consideran un caso de "discriminación e adoctrinamento" no ensino galego e acusan ao Goberno galego, do PP, de "adoptrinamento nacionalista", a pesar das críticas de Feijóo ao novo decreto do ensino do Goberno de Sánchez.
A polémica xorde, desta vez, porque as familias do colexio de primaria Os Piñeiriños recibiron un cuestionario da Xunta sobre o coñecemento e uso da lingua galega no fogar. Segundo a plataforma, trátase dun cuestionario que se envía a moitas familias no que se inquire polos usos lingüísticos no fogar. De acordo coa organización, o obxectivo é que os pais e nais "se pronuncien sobre se cren que debería haber máis clases en galego, ou se as Matemáticas se poden aprender neste idioma".
Aí está a crítica da plataforma de Lago, que destaca a necesidade de "ter presente que en Galicia, en Primaria, por decreto, o español só está asignado á materia de Matemáticas, xa que tanto Ciencias Sociais como Ciencias Naturais son obrigatorias en galego". Ante esas circunstancias, a asocaición ve "rechamante" que o goberno autonómico "pregunte se cren que as Matemáticas poden aprenderse en galego".
O CASTELÁN, "PROHIBIDO" NAS ESCOLAS
"Por outra banda", critican, "a Consellería de Educación non lles pregunta se queren recibir máis clases en español e a cuestión sobre a superioridade intelectual de quen fala español está fóra de lugar e é unha reiteración dos mantras nacionalistas, que sosteñen que quen ten como lingua propia o español ten prexuízos".
A crítica da plataforma remata aludindo a que, "por decreto está prohibido o uso do español na administración educativa", xa que, apuntan, "toda a visibilidade dos centros, as súas comunicacións co alumnado, co profesorado e coas familias está prohibido en español". Ante esta circunstancias, "este tipo de cuestionarios son contemplados con receo e como unha mostra máis do empeño do goberno galego en transmitir que o galego é a lingua asociada á educación e a cultura e a que debería transmitirse nas familias", di.
"Desde Falamos Español dirixímonos aos responsables da Consellería de Educación para solicitar máis información sobre a finalidade deste cuestionario, que algunhas familias non saben se é realmente anónimo", engaden. "Galicia é unha das Comunidades Autónomas onde máis preocupación existe á hora de denunciar publicamente os casos de discriminación e adoctrinamiento no ensino xa que cuestionar a normalización lingüística converteuse nun tabú".
