A Ciadella, o campamento militar romano en Sobrado dos Monxes que controlaba Coruña e Lugo
Os investigadores, que continúan coas súas tarefas sobre o terreo, determinaron que os militares da lexión romana abandonaron a Ciadella a finais do século III. Con todo, as estruturas foron reutilizadas como vivendas e talleres ata o século VII.
Por Europa Press / Redacción | SANTIAGO DE COMPOSTELA | 14/11/2020 | Actualizada ás 18:19
O xacemento da Ciadella, en Sobrado dos Monxes, corresponde a un campamento militar romano que protexía os intereses do imperio na actual provincia de Lugo e o norte da Coruña. É, xunto co Aquis Querquennis de Bande, o único complexo militar romano que foi recuperado en Galicia.
O antigo campamento foi obxecto dunha investigación desarollada por equipos multidisciplinares coordinados desde a Universidade de Vigo que permitiu recuperar restos e pezas arqueolóxicas, así como determinar as distintas fases de ocupación deste campamento, que foi creado no século I, catro décadas antes do que se pensaba ata agora.
Os investigadores, que continúan coas súas tarefas sobre o terreo, determinaron que os militares da lexión romana abandonaron a Ciadella a finais do século III. Con todo, as estruturas foron reutilizadas como vivendas e talleres ata o século VII.
Trátase dun complexo que constitúe un "exemplo único" de asentamento militar do Imperio Romano. Entre os achados destaca a identificación por parte dos investigadores dun gran 'horreum' destinado a gardar alimentos ou a delimitación do que constituía o edificio principal do campamento.
O material recuperado, desde vidros a pezas de cerámica e moedas, está a ser analizado nos laboratorios do GEAAT da Facultade de Historia do campus de Ourense. Así mesmo, tamén colaboran na investigación outros equipos multidisciplinares das universidades da Coruña, León e O Porto.
VISITA DO CONSELLEIRO
O xacemento foi visitado na mañá deste sábado polo conselleiro de Cultura, Educación e Universidade, Román Rodríguez, e o reitor da Universidade de Vigo, Manuel Reigosa.
O proxecto de investigación contou co apoio económico da Administración autonómica, que achegou uns 240.000 euros cofinanciados polo Fondo Europeo de Desenvolvemento Rexional nun 80%.
