A solución da Xunta para desdobrar comedores: que o fagan as familias

Continúa o tirapuxa entre Xunta de Galicia e diversos sectores da comunidade educativa. A última mobilización vén de acontecer ás portas do CEIP Pedrouzos de Brión, onde nais e pais se manifestaron na tarde do luns contra o rumbo da Consellería de Educación no tocante ó comedor escolar

“Temos que traballar, comedor xa”, ou “O Concello pon os cartos, a Xunta os obstáculos” foron os principais lemas que se puideron ler nas pancartas dos asistentes ó acto. A denuncia principal é que, en plena pandemia, a Xunta vén de “excluír” do comedor escolar “á metade das familias” usuarias, unha circunstancia que dificulta notablemente a conciliación laboral.

Segundo destaca a ANPA Andaravía nun comunicado público, a Xunta estaría a cribar o acceso ó comedor con “criterios anacrónicos” e que “non responden ás necesidades actuais que temos as familias”.  Estes baremos implicarían que o alumnado residente a máis de dous kilómetros do centro, discapacitado ou en exclusión social puidera acceder con maior facilidade ó servizo de comedor, entre outras ponderacións. En calquera caso, a problemática atópase en que, coas limitacións sanitarias, o número de alumnos que poden desfrutar das instalacións é menor.

VOLUNTARIOS NO CANTO DE MONITORES

Ante esta dificultade, o obxectivo do CEIP pasaba por desdobrar o servizo de comedor para dar cabida a todos os rapaces. O problema é que, segundo denuncia a ANPA, a Xunta estaríase negando a prover do persoal necesario para facer tal desdobre. En troques, a solución da Consellería de Educación foi “incrementar de 15 a 27” o número de voluntarios que poden exercer no comedor; un posto reservado a “pais, nais ou titores legais do alumnado do centro” que contaran con dispoñibilidade horaria. Segundo destacaba o centro uns días atrás, polo momento só se prestaron 9 persoas. 

O conflito atópase precisamente nos horarios, xa que o comedor é un recurso “fundamental” para a conciliación, segundo a ANPA. As denuncias na mobilización do pasado luns centráronse, precisamente, nas complicacións engadidas que supoñía o anuncio da Xunta. Ante esta circunstancia, a ANPA esixe á Consellería que “rectifique” os criterios “restritivos” e impulse unha segunda quenda de comedor “con monitoras e monitores profesionais”, que “garanta un servizo seguro e capaz de cubrir a demanda actual”. 

CONSELLERÍA “LITERALMENTE AUSENTE”

A asociación de Nais e Pais carga con forza contra a Consellería de Educación, á que acusa de estar “literalmente ausente” e de propor “parches” no canto de atallar o problema. “A ‘solución’ da Xunta é, en verdade, un pau nas rodas que dificulta o necesario desdobramento do comedor”, destacan no comunicado. O balón, pois, estaría no tellado de San Caetano, xa que “o colexio ten a vontade de sacalo adiante [o desdobramento]” e este “conta coa vontade do Concello”. Anuncian que seguirán mobilizándose ata contar de novo co servizo.