O equipo de '3Camiños' volve rodar dous meses e medio despois

O equipo de '3Camiños', a serie internacional sobre o Camiño de Santiago que se estreará en exclusiva na plataforma dixital Amazon Prime Vídeo, volveu á rodaxe tras un parón de dous meses e medio obrigado pola crise do coronavirus.

A produción, na que participan produtoras de Italia, Corea do Sur, México, Portugal e Galicia, renovou o seu traballo de filmación en varias localidades de Navarra baixo as novas medidas sanitarias e de seguridade pautadas para o sector audiovisual.

Protagonizada por Álex González, Verónica Echegui, Cecilia Suárez, Anna Schimrigk, Andrea Bosca e Alberto Jo Lee, '3Camiños' é a primeira serie internacional e transmedia sobre a Ruta Xacobea. Participa a produtora Ficción Producións, que conta cunha subvención de 1,5 millóns por parte da Agadic.

A rodaxe desta serie, que se estreará en Amazon Prime e despois será emitida por varias canles de distintas partes do mundo —entre elas a TVG—, desprazarase a Galicia a principios de xuño para gravar ao longo de todo o mes en localizacións como O Cebreiro, Samos, Santiago ou Fisterra.

'3Camiños' contará a historia de cinco amigos de diferentes nacionalidades unidos polo Camiño de Santiago, que se converte nun personaxe máis da trama.