Ollo, 800 quilómetros des estradas teñen perigo de colisión cun xabarín
Os avisos ao 012 de agricultores por este animal pasaron de 1.479 en 2017-18 a 3.022 en 2018-19.
Por Europa Press / Redacción | SANTIAGO DE COMPOSTELA | 13/12/2019 | Actualizada ás 13:33
Un total de 296 tramos de estradas de titularidade da Xunta de Galicia suman 792 quilómetros de concentración de accidentes provocados por xabarís. Diso informou este venres na comisión de Agricultura a directora xeral de Patrimonio Natural, Belén do Campo, quen explicou que para fixar eses tramos de concentración de accidentes o cociente ten que ser dun atropelo de xabaril por quilómetro.
O deputado Xosé Luís Rivas, Mini (BNG), criticou a "incompetencia" e "improvisación" sobre a xestión do xabaril por parte da Xunta. Lamenta que non conta "con ningún censo medianamente fiable", á vez que decreta unha emerxencia cinexética "sen ter unha base científica".
Ademais, o deputado nacionalista denuncia que o teléfono de avisos sobre danos "non contesta ou sae unha máquina", polo que as compensacións por danos "non chegan a nada" e "a desesperanza é moita".
Nesta liña, José Manuel Pérez Seco (PSdeG) censurou o "fracaso actual do sistema de xestión do xabaril", cunha "masiva poboación" que "está descontrolada". Ademais, acusa á Xunta de "pór en perigo aos cazadores e a calquera persoa" que "se atopa ao aire libre".
"EN BASE A DATOS OBXECTIVOS"
En resposta, Do Campo defendeu que a declaración de emerxencia cinexética polo xabaril tómase "en base a datos obxectivos" como o aumento de danos e de accidentes de tráficos.
A isto únense os datos do Ministerio e un proxecto europeo, polos que se prevén que a poboación deste animal se duplique en 2025, afirmou. A continuación, sinala que os avisos ao 012 de agricultores pasaron de 1.479 en 2017-18 a 3.022 en 2018-19. Ademais, remarcou a importancia de conter a esta especie para evitar riscos sanitarios como a peste porcina africana. "Non se se queren que actuemos ou que non queren que actuemos", díxolle á oposición.
Por iso, Do Campo xustificou que se decidiu adoptar medidas para "axilizar" o control, "falado co sector" da caza. "Estamos a facer os nosos deberes", sostén.
