“Os elefantes de Sokúrov” de Antón Riveiro Coello

Descubrín a maxia da escrita de Antón Riveiro Coello e volvín recuperar a cidade de Compostela na que vivín tantos anos nas páxinas de Os elefantes de Sokúrov. Explícome, deixei xa fai uns anos a Cidade do Apóstolo, na que tantos e bos momentos vivín e á que volvo cada certo tempo, ben sexa física ou imaxinariamente.

Por A arte é azul - Tensy Gesteira | Bueu | 03/02/2017

Pois ben, Compostela resulta sempre unha cidade inspiradora, e dela parte o autor limián para crear unha obra sobre a memoria, e na que atopamos continuas e ben claras descricións desta terra tan marabillosa.

En cada unha das letras vemos maxia, palabras que encaixan á perfección nunha historia que é en realidade moitas historias, nas que se mesturan as referencias á cidade, á lingua galega, á memoria, ao amor e ao sexo, á vellez, á crise económica, ao suicidio, á culpa, á arte, á relixión, ao paso do tempo, ao peso da morte… Os elefantes de Sokúrov consta de moitas arestas, de pequenas historias  que se desenvolven paseniñamente ata precipitarse nun final sorprendente.

“Encántame o idioma e Compostela tamén está edificada sobre el, e iso fai que a percepción que eu poida ter da cidade sexa moito máis completa a través das palabras que a acariñaron durante anos. É unha lingua apegada á pel, ao alento, á alma dos que viven e viviron aquí. Miro de comprender a cidade coma un pracer mítico, intelectual, e o idioma tamén forma parte dela. Gusto do galego, a súa resonancia esgotada e melancólica que o envolve todo nunha saudade antiga, escura coma unha oración”.

As referencias á lingua propia e á querenza da mesma atópanse sempre insertas nunha cidade que ten un aquel de nostalxia, de lembranza do pasado, de reflexión sobre o bo e o malo das nosas vidas, e sobre o peso que xogan as coincidencias.

Os elefantes de Sokúrov é xa unha das mellores novelas que lin en galego, porque fala de temas que hoxe nos preocupan a todos e todas, pero tamén pola súa capacidade de evocar espazos comúns, lugares que se describen desde a memoria emprestada, desde ese ollar que ve os acontecementos e vivencias propios dende as lembranzas dos outros. Aí reside a maxia de Riveiro Coello, que é quen de combinar moitas voces e intercalalas para que unhas expliquen as outras.

“Ás veces penso se eu rematarei así, sendo un vello solitario, sen familia nin máis compaña ca os libros e algunha película rara que xa ninguén quererá ver comigo”.

A cita anterior é moi paradigmática para entender cal é a sensación que percorre todo o libro: a dunha sinceridade que nos fai tremer, e máis cando fala de temas tan humanos e tan á orde do día. Bravo Antón Riveiro Coello, por facer poesía das cousas e sentimentos grises, pero sobre todo, grazas por darlle a Santiago de Compostela unha voz protagonista que só escoitamos os que amamos esa chuvia que empapa as súas pedras.

Ficha técnica

Título: Os elefantes de Sokúrov

Autor: Antón Riveiro Coello

Editorial: Galaxia

Ano de publicación: 2016

Número de páxinas: 405


 

Tensy Gesteira

Tensy Gesteira, xornalista e redactora no blog de literatura Lecturafilia, creado en 2013. Son das persoas que penso que unha vida se explica a través da cultura que te acompaña nela, e por iso me rodeo de infinitos libros, son una bibliófila que le en cada oco que ten libre, e que goza compartindo impresións cos demais. Nesta sección atoparedes un pouco de min, dese pouso que os libros deixan, e sobre o que estes me fan reflexionar.
linkedin.com/tensygesteira
facebook.com/tensygesteiraestevez
twitter.com/tensygesteira

 

A TÚA ACHEGA FAI QUE GC POIDA PUBLICAR NOVAS COMA ESTA. SÓ DEPENDEMOS DE TI.

¿Gustouche esta nova?
Colabora para que sexan moitas mais enviando un SMS coa palabra GC ao 25511



Comenta

Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións). Agradecemos a túa colaboración.

¿Que caracteres alfanuméricos hai na imaxe? descarta espazos e signos

Exemplo: para C*8 Km@ introducir c8km.

captcha

¡Non entendo o texto!: cambiar imaxe






¿Que caracteres alfanuméricos hai na imaxe? descarta espazos e signos

Exemplo: para C*8 Km@ introducir c8km.

captcha

¡Non entendo o texto!: cambiar imaxe



Portada do libro de Sokúrov