Ecoloxistas abordan ao conselleiro do Medio Rural para denunciar a contaminación con xurro da Baixa Limia

Membros do Movemento Ecoloxista da Limia  (MEL) aproveitaron a visita do conselleiro do Medio Rural, José González Vázquez,  a Xinzo de Limia este venres para entregarlle  un dossier de máis de trinta fotos onde se pode comprobar a desfeita ecolóxica que están provocando os vertidos ilegais de xurros na zona e que, din, son a causa das cianobacterias que intoxican o encoro de As Conchas que leva varios anos sufrindo unha eutrofia que impide incluso o baño.

Os ecoloxistas abordaron ao conselleiro xa que se nega a recibilos. Tras un intercambio de palabras, González Vázquez dixo que Medio Rural non tiña nada que ver con esta contaminación, pois correspondíalle a Confederación Hidrodrafica Miño-Sil velar pola saúde das augas.  Pero o presidente do MEL, Manuel García, contestoulle que nunha recente entrevista co Comisario de Augas da citada Confederación, este lle confirmou que o control da boa xestión dos residuos agrogandeiros era competencia da Consellería do Medio Rural e que a Confederación pouco podía facer se a Consellería  “facía a vista gorda” coa instalación de novas explotacións ou ampliación das xa existentes sen contar coas instalacións adecuadas  para depositar os residuos dos animais.

PREOCUPACIÓN

Os ecoloxistas destacaron que a xente estaba moi preocupada, porque a magnitude da carga gandeira que estaba soportando A Limia era totalmente desproporcionada. Deste xeito, contando os concellos da chaira xunto cos Concellos de Os Blancos, de Baltar e de Calvos de Randín serían arredor de 400 explotacións que xeran máis de 1.000.000 de toneladas de residuos agrogandeiros e que en demasiadas ocasións non son utilizados como fertilizantes, senón que se converten en vertidos ilegais.

Tamén, criticaron o “esperpéntico” caso da empresa ASER, que (subvencionada con cartos públicos)  se adica a transportar cos seus enormes camións cisterna os xurros dos porcos e que “en máis dunha vez os teñen pillado vertendo a cano libre en calquera recuncho escondido da comarca” . Ao escoitar isto, o conselleiro solicitou probas que demostrasen que eses feitos se estaban producindo. O presidente do MEL díxolle que o Seprona fixera xa varias denuncias e que na Fiscalía de Medio Ambiente de Ourense se estaban tramitanto dilixencias de Investigación en base a varias denuncias interpostas por particulares. Asemade, díxolle  que o MEL e a Sociedade Galega de Historia Natural estiveron reunidos con membros da Comision Europea  explicando toda esta problemática.

Finalmente, o membro do MEL reprochou que a Consellería do Medio Rural nunca contestaba as solicitudes de información ambiental, e que tampouco  concedía as reunión que hai tempo o MEL leva pedindo. Queren abordar con el a promulgación urxente do Decreto da Xestion de Residuos Agro-gandeiros, dado que o a orixe da contaminación é culpa e debido a inexistencia dun plan de xestión de Residuos (como existe noutras Autonomías), nin a obrigación por parte de granxeiros e agricultores de cumprir co imprescindible Código de Boas Prácticas Agricolas e Gandeiras, que en teoría é unha das exisencias á hora de aprobar as axudas da PAC.

O conselleiro comentou coa súa secretaria que efectivamente tiña que “buscar un oco” na súa axenda para ter esa reunión, e que terían  que tratar desta problemática tamén cos Granxeiros e coñecer o seu parecer.