Un detector de raios cósmicos feito en Galicia axudará a resolver un dos misterios para a ciencia

Está destinado á Campaña Polar Española na Antártida e foi desenvolvido nunha colaboración entre a Universidade de Santiago e o LIP de Coimbra (Laboratorio de Instrumentación e Física Experimental de Partículas). Búscase profundar na forma de corrixir en terra o efecto da temperatura da atmosfera nos raios cósmicos, problema que está sen resolver.

Por Galicia Confidencial | Santiago de Compostela | 21/11/2018 | Actualizada ás 16:34

Comparte esta noticia

O detector de raios cósmicos de alta resolución TRISTAN (Trasgo para Investigacións Antárticas) viaxa xa cara a Antártida a bordo do buque oceanográfico Sarmiento de Gamboa nunha misión de apoio á Campaña Polar Española. TRISTAN foi desenvolvido por unha colaboración entre a Universidade de Santiago (USC) e o LIP de Coimbra (Laboratorio de Instrumentación e Física Experimental de Partículas) e irá tomando datos de forma continua entre os paralelos 42ºN (Vigo) e 53ºS (Punta Arenas, Chile), que se sumarán aos que recolecte no traxecto de regreso a próxima primavera, informa a USC.

Juan A. Garzón, primeiro pola dereita, xunto a integrantes do equipo encargado do desenvolvemento co detector TRISTAN no 'Sarmiento de Gamboa'
Juan A. Garzón, primeiro pola dereita, xunto a integrantes do equipo encargado do desenvolvemento co detector TRISTAN no 'Sarmiento de Gamboa' | Fonte: USC.

O equipo encargado do desenvolvemento de TRISTAN agarda con esta campaña reunir unha gran cantidade de datos de alta precisión en dúas épocas do ano distintas (outono e primavera), o que permitirá profundar na forma de corrixir en terra o efecto da temperatura da atmosfera nos raios cósmicos, problema que está sen resolver dende o seu descubrimento a comezos dos século XX

O proxecto TRISTAN está dirixido polo profesor Juan A. Garzón, do LabCAF do Instituto Galego de Física de Altas Enerxías e forma parte da colaboración ORCA (Observatorio de Raios Cósmicos Antártico) que coordina o profesor da Universidade de Alcalá Juan José Blanco. Esta última achega ao observatorio un monitor de neutróns de baixa e alta enerxía e un telescopio de muóns. 

O detector instalarase de forma definitiva no observatorio ORCA na base antártica española Juan Carlos I na próxima campaña 2019-2020. Deste xeito, o observatorio terá capacidade para medir a incidencia de raios cósmicos en superficie nesta rexión cun precisión angular e unha capacidade de identificación de partículas sen precedentes.

Os rexistros que se acaden permitirán mellorar o coñecemento tanto da natureza e e orixe dos raios cósmicos como da actividade solar ou o campo magnético terrestre, entre outros.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta