En Marea aposta por alianzas para as europeas que respecten a súa "plena soberanía"

A dirección de En Marea aposta por establecer alianzas para concorrer ás eleccións europeas do próximo mes de maio a condición de que se respecte a súa "plena soberanía" como organización e que os seus representantes na candidatura o fagan unicamente en nome de En Marea.

Así o recolle a proposta do Consello das Mareas, máximo órgano de dirección do partido instrumental entre plenarios, que será sometida a opinión dos inscritos no conclave que En Marea celebrará o próximo 27 de outubro na Facultade de Económicas de Santiago.

Os documentos aprobados a pasada semana polo Consello foron remitidos o sábado aos máis de 3.000 inscritos cos que conta a organización, que terán até o día 21 para presentar emendas ás proposicións da dirección.

Nestes documentos, aos que tivo acceso Europa Press, abórdase, ademais do regulamento do propio plenario, a estratexia a seguir por En Marea no panorama político estatal, a maneira de presentarse ás eleccións europeas e as normas do proceso interno polo que o partido instrumental renovará os seus órganos de dirección.

ELECCIÓNS EUROPEAS

En canto á proposta da dirección para concorrer ás eleccións europeas do próximo 26 de maio, o Consello aposta "preferentemente" por establecer alianzas con outras forzas políticas que compartan principios políticos e programáticos. No entanto, abre a porta a presentarse en solitario en caso de non lograrse unha "coincidencia ampla de estratexia política" para configurar candidatura de unidade.

Así, avanza que levarán a cabo contactos ou "prospeccións" para testar a posibilidade de alcanzar unha "gran alianza" pero que serán os inscritos de En Marea quen teñan a "última palabra" sobre como concorrer ao proceso electoral, que será decidido a través dunha consulta telemática entre as bases.

Deste xeito, á hora de realizar pactos, o documento marca como liña vermella o recoñecemento do dereito de autodeterminación dos pobos e o carácter de Galicia como nación. E isto, segundo a dirección, implica que a papeleta electoral en Galicia debe ser "diferenciada" da do resto do Estado e que as persoas que vaian na lista "representen unicamente ao espazo de En Marea" e, por tanto, non figuren en nome de "algunha das partes" que conforman a confluencia --EU, Anova, Podemos ou as mareas municipalistas--.

Ademais, expón que se explore a posibilidade de establecer unha "alianza confederal, máis aló de Unidos Podemos" con organizacións "similares" a En Marea en conxunto do Estado español para, deste xeito, levar a cabo "un modelo de Europa común".

CALENDARIO ELECTORAL

De recibir o visto e prace dos inscritos nos termos que propón o Consello, estas eleccións internas desenvolveríanse entre o 27 de novembro co arranque da campaña e as 09,00 horas do luns 3 de decembro, día no que se pecharían as votacións iniciadas 48 horas antes.

Unha vez aprobado o regulamento das primarias --ao longo do plenario do día 27-- clausuraríase o censo para poder participar nelas e emitir voto. O prazo para presentar candidaturas sería do 20 ao 23 de novembro e a proclamación definitiva de listas, unha vez pasado o período de corrección, produciríase o luns 26.

Así as cousas, a dirección de En Marea expón que os sábados 8 ou 15 de decembro se celebre a constitución do novo Consello das Mareas que, á súa vez, elixirá os membros da Coordinadora Nacional (equivalente á executiva nun partido clásico). Para este órgano non poderán ser elixidas persoas que ostenten cargos en equipos directivos doutras organizacións, que si terán permitido presentarse ao Consello.