Volven as choivas a Galicia tras un inicio de outono seco

As choivas causan cerca de 50 incidencias en distintos puntos da Coruña e Pontevedra.

Por E.P. | SANTIAGO DE COMPOSTELA | 11/10/2018 | Actualizada ás 10:10

Comparte esta noticia

Os servizos de emerxencias atenderon durante a madrugada deste xoves preto de 50 incidencias relacionadas coas choivas caídas en Galicia e que mantiveron activo até primeira hora o aviso de nivel amarelo nas provincias da Coruña e Pontevedra.

Temporal en Santiago, choiva, temporal, paraugas, vento
Temporal en Santiago, choiva, temporal, paraugas, vento

Segundo informou o Centro Integral de Atención a Emerxencias 112-Galicia, a maior parte das incidencias foron provocadas pola caída de árbores e ramas e, por sorte, non hai que lamentar persoas feridas.

A provincia da Coruña foi a que concentrou o maior número de incidencias relacionadas coa meteoroloxía, un total de 25, das que 12 foron retirada de atrancos que entorpecían a circulación, como árbores, ramas, cables ou postes de iluminación caídos nas estradas.

Ademais, os servizos de emerxencias atenderon na Coruña 13 incidencias relacionadas con inundacións en vivendas, rúas e bolsas de auga en estradas.

En Pontevedra, pola súa banda, tiveron lugar 22 incidencias, das que 16 foron caída de árbores, ramas ou outros obstáculos e 12 inundacións ou bolsas de auga.

Os concellos que rexistraron mais incidencias foron A Pobra do Caramiñal, Boiro e Ribeira, na Coruña, con cinco intervencións cada un; e Moaña (Pontevedra), onde se rexistraron tres incidencias.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta