SANTIAGO DE COMPOSTELA | 10/10/2018 | Actualizada ás 20:55 por EUROPA PRESS
O Centro Galego de Artes da Imaxe (CGAI)-Filmoteca de Galicia acolleu a preestrea do documental de Formato Producciones 'Almoina, o heroe infame', unha longametraxe para televisión dirixida polo realizador, escritor e guionista Breogán Riveiro, que aborda a esquecida figura do lucense José Almoina Mateos.
O documental foi realizado co apoio da Consellería de Cultura e Turismo, a través da liña de subvencións da Axencia Galega das Industrias Culturais (Agadic) á produción audiovisual, e conta coa participación da TVG.
O director do Agadic, Jacobo Sutil, e o director de contidos da TVG, Fernando R. Ojea, acompañaron na tarde deste mércores no CGAI a Andrés Barbé, produtor de Formato Producciones, e a Breogán Riveiro, no acto de preestrea, no que se destacou a pertinencia de títulos que, como este, suman ao seu valor como obra audiovisual a súa achega á divulgación histórica.
Sutil lembrou que a longametraxe foi un dos proxectos adxudicatarios en 2015 dunha axuda de preto de 30.000 euros por parte da Xunta de Galicia, a través das subvencións de Agadic a producións e coproducións audiovisuais, na categoría de longametraxes documentais para televisión.
"Esta canle é nosa principal liña de subvencións ao fomento do sector audiovisual galego, ao que cada ano dotamos de dous millóns de euros e completamos con outras concorrencias específicas para a promoción do talento, o desenvolvemento de proxectos ou a presenza en festivais de prestixio", sinalou, á vez que se referiu a outros títulos subvencionados que acaban de chegar ou o farán, proximamente, ás pantallas.
En concreto, apuntou a 'La sombra de la ley', de Vaca Films; 'Trote', de Frida Films, ou a serie 'O sabor das margaridas', de CTV, entre eles.
HISTORIA DE PEPE ALMOINA
O documental de Breogán Riveiro dedícase á figura de Pepe Almoina (1903-1960), fillo dun importante médico de Lugo. Foi membro do PSOE, masón, deputado, perseguido na guerra civil, exiliado na República Dominicana, profesor na Universidade de Santo Domingo e secretario persoal do ditador Rafael Leónidas Trujillo, traballo este último polo que foi expulsado do Partido Socialista e polo que moitos exiliados o condenaron ao ostracismo.
O documental narra como, a pesar da súa lenda negra como colaboracionista, Almoina mantén un dobre xogo de denuncias, enganos e ataques ao ditador dominicano baixo o pseudónimo de Gregorio Bustamante, xogo que --xa exiliado en México-- custaríalle a vida a mans do servizo secreto de Trujillo, explica a Consellería de Cultura nun comunicado.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.