Fin de festa no Porto de Vilaxoán

Como dixo días atrás a presidenta da Deputación de Pontevedra, Carmela Silva, “Revenidas fala do que somos, da nosa cultura, da nosa lingua e da nosa tradición”. Un festival senlleiro que este ano cumpre 15 anos en constante evolución e cunha proposta integradora de estilos musicais, propostas culturais e compromiso co medio ambiente coa posta a disposición dos asistentes de vasos reutilizábeis con mensaxes de sensibilización para a reciclaxe e a diminución de residuos plásticos.

No cartel deste ano, con máis de 40 bandas, conviven diferentes estilos musicais, feito que fai deste evento tamén un encontro multicultural e aberto a todos os gustos. Así, podemos atopar, entre outras alternativas, ska, punk, rock, pop, garaje, rap, funk, reggae, folque ou música electrónica.

Hoxe, día de peche do festival, ás 13.00 h. actuará a formación The Dawlins e a partir das 17.00 h. agárdanos unha gran tarde de música en directo. No Escenario Mahou estarán High Paw & Elephant Yard, Zoo, Auxili e Dakidarria, mentres que no Escenario Fest Galicia estarán El Diluvi, Banda Xangai, Russkaja e Xavi Sarriá i el cor de la fera.

Na apertura de portas ás 17.00 h. e ao remate dos concertos cara as 3.00 h. amenizará La Duendeneta.

Unha das sorpresas da tarde virá da man de Xurxo Souto, da Banda Xangai, que anunciou a actuación da Coral de Vilaxoan durante o seu concerto.