Así foi a exhumación dos restos dos catro guerrilleiros asasinados polo franquismo en Val do Dubra

A Asociación para a Recuperación da Memoria Histórica levou a cabo en 2016 os traballos de exhumación dos restos de catro guerrilleiros, asasinados pola Garda Civil en marzo de 1949 na parroquia de Paramos (Val do Dubra). Eran unha muller e tres homes: Manuela Teiga, José María Castelo Mosquera, Vicente Peña Tarrasa, e un cuarto corpo que as análises de ADN confirmaron como o de Manuel Pena Camino.

Os corpos dos guerrilleiros antifranquistas foron achados nunha foxa común do atrio da igrexa de Paramos. Este próximo sábado, 28 de xullo, ás 12:30, no Auditorio de Bembibre, celebrarase o acto de entrega dos restos xa identificados ás súas familias.

O colectivo audiovisual Lentes Diverxentes quixo estar presente nos traballos de exhumación, para darlle visibilidade á loita pola recuperación da memoria e a dignidade destas persoas que loitaron e deron a súa vida pola liberdade e a xustiza.