A Universidade de Santiago avanza contra o alzhéimer

Investigadores do Campus Terra identifican a concentración crítica para a formación de agregados tóxicos desta enfermidade neurodexenerativa

Por Galicia Confidencial | Santiago de Compostela | 13/03/2018 | Actualizada ás 16:47

Comparte esta noticia

A enfermidade neurodexenerativa de Alzheimer está relacionada coa aparición de pequenas aglomeracións dunha proteína natural, a beta-amiloide, nos cerebros dos pacientes. Investigadores do Campus Terra da Universidade de Santiago de Compostela (USC) lograron demostrar por primeira vez que a forma máis tóxica desta proteína, a Ab-42, forma aglomerados de xeito espontáneo en canto a súa concentración supera un certo límite. Este importante resultado foi publicado na revista prestixiosa Scientific Reports da editorial Nature Publishers.

Mercedes Novo, Sonia Freire e Wajih Al-Soufi, nun laboratorio da Facultade de Ciencias de Lugo
Mercedes Novo, Sonia Freire e Wajih Al-Soufi, nun laboratorio da Facultade de Ciencias de Lugo | Fonte: USC.

Aplicando unha técnica ultrasensible, capaz de analizar moléculas individuais, a investigadora Mercedes Novo e o seu equipo determinaron a concentración crítica da formación de agregados pequenos da proteína beta-amiloide Ab-42 no medio fisiolóxico, informa a USC.

“Logramos avanzar no estudo desta proteína grazas ao traballo meticuloso da doutora Sonia Freire”, salientou Novo. “Outros laboratorios analizaron variantes da proteína máis fáciles de manexar, pero nós puxémonos como reto dar coas condicións experimentais adecuadas para o amiloide Ab-42, a variante máis relevante para a enfermidade. É moi difícil de manexar e custounos varios anos de traballo e moita paciencia obter resultados fiables -un tempo que laboratorios grandes moi competitivos xa non están dispostos a investir-”, explica .

A investigación dirixida por Mercedes Novo e Wajih Al-Soufi, profesores da Facultade de Ciencias de Lugo e investigadores do Grupo de Química Biofísica, Fotofísica e Espectroscopía da USC, demostra que a agregación inicial da proteína ten grandes similitudes coa ensamblaxe espontánea de micelas a partir de moléculas de surfactante, que foi amplamente estudado polos autores e permitiulles modelizar o proceso de agregación do beta-amiloide.

A existencia dun réxime de concentracións baixas libre de agregados da proteína Ab-42 apoia a hipótese máis aceptada actualmente de que un aumento da concentración desta proteína no cerebro pon en marcha unha fervenza de procesos que leva á enfermidade de Alzheimer, onde os pequenos agregados formados nas etapas iniciais serían os maiores responsables da toxicidade. Por iso, unha mellor comprensión destes procesos iniciais é crucial na loita contra esta enfermidade neurodexenerativa.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta
Comentarios 1 comentario

1 Hispanidad

Afortunadamente, están sacando muchos medicamentos que mejoran sustancialmente el avance de enfermedades tan devastadoras como esta. Es un alivio saber que la ciencia avanza a pasos agigantados.