Reivindican o papel das mulleres na viticultura heróica de Galicia

Co gallo do Día Internacional da Muller, e como anticipo á 36 edición da Feira do Viño de Chantada, a Asociación Polamiúda organizará un espazo de encontro para dar visibilidade e recoñecer o traballo das mulleres que participan no proceso de elaboración, comercialización ou investigación do viño da Ribeira Sacra na zona de Chantada.

Nesta xuntanza está previsto que participen viticultoras, enólogas, adegueiras, sumilleres e mulleres de calquera outra disciplina ou oficio relacionados co viño. Realizarase unha mesa redonda coa representación de mulleres de diferentes ámbitos para poñer en valor e visibilizar a man da muller nun mundo que se relaciona case exclusivamente cos homes e non é así.

O acto terá lugar este xoves no Auditorio Municipal de Chantada, empeza ás 20.00 h. Ademais da mesa redonda referida, haberá unha degustación comentada de viños das viticultoras presentes e actuacións dos grupos musicais “Chorimas” e “Punkdereteiras”.

Outro detalle non menos importante de recoñecemento para as mulleres é o deseño do cartel desta edición, obra do artista lucense afincado en Chantada, Lomarti. A protagonista do mesmo é unha dona bebendo unha copa de viño.