O CHUS estrea a primeira unidade de Galicia para controlar efectos secundarios de tratamentos oncolóxicos

O Complexo Hospitalario Universitario de Santiago (CHUS) pon en marcha a primeira unidade mixta de cardio-onco-hematoloxía de Galicia para previr e controlar efectos secundarios dos tratamentos oncolóxicos, que supón a segunda causa de morte nestes enfermos.

A nova unidade foi presentada este xoves polos xefes dos tres servizos implicados xunto á xerente da área sanitaria compostelá, Eloína Núñez. Todos eles destacaron que os avances no diagnóstico precoz e no tratamento do cancro permitiron aumentar a supervivencia dos pacientes oncolóxicos, "o que puxo de manifesto os efectos secundarios dos tratamentos oncolóxicos a longo prazo".

Neste sentido, o responsable do servizo de Cardioloxía, o doutor José Ramón González-Juanatey, explicou que o tratamento do cancro se comporta como outro factor de risco e asóciase a efectos secundarios no sistema cardiovascular.

Respecto diso, incidiu en que, en especial as mulleres con cancro, "uns anos despois" do tratamento poden sufrir "problemas cardíacos graves", como insuficiencia cardíaca, que se pode "previr".

Así mesmo, o doutor Juanatey fixo tamén fincapé nos nenos con cancro, sobre os que asegurou que "se multiplica por 25" o risco de sufrir un infarto na idade adulta após o tratamento oncolóxico. "Hai que facer unha prevención global", sostivo.

Neste sentido, o xefe do servizo de Oncoloxía do CHUS, Rafael López, apuntou que un estudo estima que un 20 por cento de mulleres que padeceron un cancro pode ter un problema cardíaco; así como entre un 15 e un 20% dos que tivesen de colon ou pulmón.

Por iso, ambos os profesionais, xunto co xefe do servizo de Hematoloxía do CHUS, José Luis Bello, apostan polo traballo conxunto de cardiólogos, oncólogos e hematólogos en equipos multidisciplinares para elaborar protocolos propios de prevención e tratamento precoz da cardiotoxicidade.

"ERA UNHA OBRIGA"

O doutor Juanatey, quen matizou o "papel fundamental" da enfermaría nesta unidade, comentou que optaron por "organizarse" os diferentes servizos implicados nesta "unidade mixta funcional" porque "era unha obriga facelo". Mentres, Rafael López engadiu que se trata de "controlar os efectos secundarios nos sobreviventes" de cancro.

Pola súa banda, José Luis Bello destacou que se trata dunha "unidade nova" que, por mor dos "novos fármacos" contra o cancro fronte aos seus efectos secundarios fará que "os pacientes estean debidamente atendidos".

A xerente da área sanitaria compostelá, polo seu lado, valorou a posta en marcha desta unidade mixta no CHUS porque facilitará, en especial, que mulleres con cancro "teñan esa prevención de posibles efectos secundarios que van ter".