Analizarán as estratexias soberanistas catalás desde Galicia
O Comité Galego de Solidariedade Internacionalista, Mar de Lumes, organiza unha serie de actividades para achegar unha visión máis de preto sobre o soberanismo catalá. Haberá actos en Santiago, A Coruña e Ourense.
Por Moncho Mariño | Santiago | 25/02/2018 | Actualizada ás 14:02
O membro das CUP, Albert Brotan, foi convidado polo colectivo Mar de Lumes para dar unha serie de conferencias en Galicia entre os días 28 de febreiro e o 1 de marzo. Brotan foi membro do Parlament de Catalunya a pasada lexislatura. A súa presenza responde ao desexo de poder explicar as posturas e estratexias dentro do movemento soberanista catalán e que desembocaron na actual situación en Catalunya.
Os motivos desta palestra explícaos a Galicia Confidencial Óscar Valadares, membro de Mar de Lumes: "entre os seus tres principios fundamentais do colectivo, está a defensa do dereito de autodeterminación dos pobos, independentemente de como se materialice ese dereito". Nese sentido, Valadares apunta que "en Catalunya ese proceso político está aberto e nós o apoiamos de maneira clara", de feito "Mar de Lumes fixo parte da Plataforma Galiza con Catalunya".
CALENDARIO
A Plataforma estivo moi activa o ano pasado, pero agora mesmo "está pendente que se aclaren os acontecementos porque coa situación actual é algo complexo". Por isto último "para clarificar o proceso sen que veña mediatizado por diversas axendas, para iso trouxemos a Botran". O membro das CUP non é a primeira vez que vén a Galicia. Participara nalgunhas palestras sobre o dereito de autodeterminación organizadas en Galicia.
O calendario destas xornadas é o seguinte, o día 28 de febreiro ás 20:00 na Facultade de Ciencias Políticas da USC; o día 1 de marzo ás 12:00 horas na Facultade de Socioloxía da Universidade da Coruña e ese mesmo día ás 20:00 en Ourense no centro social A Galleira. O día 2 de marzo haberá un encontro coa prensa no Auditorio de Galicia.
